Elkarrekin Podemosek etxebizitzen eraikuntza txertatu du aurrekontuetan
Koalizio moreak abstentziora jo zuen kreditu aldaketaren bozketan. Positiboki baloratu dituzte neurrietako batzuk, baina hiritarrei benetako irtenbideak emango dizkieten neurriak garatzearen alde egin dute.
Maiatzeko osoko bilkuran, kreditu aldaketaren aferan, abstentzioa bozkatu zuela gogorarazi du Elkarrekin Podemosek. 2024ko aurrekontuek “gai asko ahaztu” zituztela aitortu du David Nuño alderdi moreko udal bozeramaileak. Nuñok gaineratu du koalizio moreak “argi” zuela kreditu aldaketa “aukera” bat zela “funtzionatzen ez duen hiri eredua” aldatzen hasteko. Hori dela eta, koalizioak hamaika neurri proposatu ditu etxebizitzari, aparkalekuari, kontziliazioari, instalazio publikoei edota inflazioari irtenbidea bilatzea xede dituztenak.
Horien artean, udal gobernuak onartu duen eta txostenera gehitu duena nabarmendu du koalizioak: alokairu sozialeko etxebizitza publikoen eraikuntza Kale Nagusiko 7. zenbakian. “Uste dugu kokaleku egokia dela eraikuntza eredua aldatzeko eta Irunen etxebizitza sustatzeko”, esan du bozeramaileak. Partidak 75.000 euroko kostua du, eta bere helburua alternatiben azterketa kontratatzea dela zehaztu dute, “oinarrizko eta egikaritze proiektua alokairuko etxebizitza babestuen sustapen berri bat abian jartzeko“.
Nuñok adierazi du hauteskunde kanpainan Jose Antonio Santano alkate ohiak onartu zuela Irungo etxebizitza ereduaren garapena “ez dela egokia” izan, eta Irunvik, 2017ko txosten batean, zehaztu zuela “aukera onena” alokairu soziala bultzatzea zela. Elkarrekin Podemosen proposamenak eredua aldatu daitekeela erakusten duela azaldu du udal bozeramaileak, nahi dutena baita Irun “bizitzeko, hazteko eta garatzeko” hiri bat izatea. Horretarako, alokairu sozialeko etxebizitza publiko indartsuak beharrezkoak direla adierazi dute.
Hala ere, koalizio moreak “apustu handiagoa” egin zuela jakinarazi du. “Kreditu aldaketarako gure jatorrizko proposamenak irtenbidea bilatu nahi zien etxebizitzari, aparkalekuari, kontziliazioari, instalazio publikoei edota inflazioari”, esan du Nuñok. Koalizioak proposamenen “kalitatea” goratu zuen, eta Kale Nagusiko etxebizitzen eraikuntza, Katea auzoko parkingaren eraikuntza eta 60 urtetik gorako pertsonen indarkeria matxistaren aurkako kanpaina abiatzea abstentziora jotzeko “nahikoak” izan zirela zehaztu du.
“Irunek dituen erronkentzat gutxi da hori, gure proposamena harago baitzihoan etxebizitzaren, aparkalekuaren eta kontziliazioaren alorretan. Hala ere, horiek arazo handiei erantzuna emateko lehen pausoak dira, eta uste dugu jarraitu beharreko bidea adierazten dutela. Udal Gobernuak horrela jarraitu beharko luke benetan hiritarren bizitza hobetu nahi badu. Horregatik, momentuz nahikoak direla ikusten dugu, baina bizitza duin baten, kontziliazio neurrien eta kalitatezko mugikortasun eta zerbitzu publikoen aldeko neurriak eskatzen jarraituko dugu”, esan du Nuñok.
