Decathlon eta Merkal Calzadoseko langileak mobilizatzen ari dira
Kirol dendako langileek larunbat honetan egingo dute hirugarren lanuzte eguna. Zapata dendako langileek, berriz, hirugarren greba hilabetea beteko dute ekainean. Egoera salatzeko bi ekintza berezi egingo dituzte larunbat honetan.
Irungo Txingudi Merkataritza zentroan dauden zenbait enpresetako langileek mobilizatzen dihardute. Gaur goizean 11:00etan Irungo Mercadonaren aurrean elkarretaratzea egingo dute, pasa den astean saltokiak kaleratu zuen ELAko ordezkari sindikalari elkartasuna adierazteko. Hilaren 8rako, berriz, Decathloneko zein Merkal Calzadoseko langileek ekintza bereziak antolatu dituzte.
Kirol dendako langileek larunbat honetan egingo dute hirugarren lanuzte eguna. Egun horretan bi lanuzte egingo dituzte: 11:00etatik 13:00etara lehena eta 17:00etatik 19:00etara bigarrena. Guztira 50 langile ditu Irungo Decathlonek. ELAk du ordezkaritzaren gehiengoa eta 2023ko abendutik enpresarekin biltzeko saiakera egiten ari dira. Gaurko egunera bilera bakar bat ere egitea lortu ez dutela salatu du sindikatuak. Haatik, lanuzte egin bitartean prekarietatearen ginkana prestatu dute larunbaterako. Goizeko 11:00etan hasiko dute ekintza.
Merkal Calzadoseko langileek aldiz, hirugarren greba hilabetea beteko dute ekainean. Kasu honetan ere 50 dira enpresa honetako langileak. Hitzarmen berria adosteko negoziaketa betean ari diren arren, enpresa oztopoak jartzen ari dela salatu dute, “ez aurrera, ez atzera”. Egoera ikusita orain arte egin bezala, ekaineko astelehen, ostiral eta larunbatetan grebarekin jarraitzea erabaki dute.
ELA sindikatuak jakinarazi duenez antzinakotasun handia duten langileak dira borrokan dabiltzanak: 10, 20 eta 30 urtez enpresan aritutakoak. Hitzarmen berrian urteetan egindako lana aintzat hartzeko eskatzen dute, baita familiaren kontziliaziorako neurriak hartzeko ere. Izan ere, langileek larunbatero egin behar dute lan, eta libre dauzkaten larunbat bakanak (urtean lau) ezin dituzte askatasunez aukeratu. Hori horrela, “baldintza kaskarrak” salatzeko Prekarietatearen bingoa antzerkia egingo dute. Larunbat goizean izango da emanaldia, eguerdiko 12:00etan.
