Bertsio gauari jarraipena emateko, 'PTP Jaia'
Larunbat honetan musikak ez du etenik izango. Guztira 12 talde arituko dira Psilocybenea Aretoko oholtza gainean. Jai berean P30 musika bilduma aurkeztuko dute.
Larunbat honetarako ‘PTP Jaia’ antolatu du Psilocybe elkarteak. Aretoaren festa “ikoniko” bati, alegia, Bertsio gauari 
jarraipena emateko sortu dute. Eskualdeko 12 taldek parte hartuko dute eta guztientzako lekua izan dadin kontzertuak bi oholtzetan banatuko dituzte. Festa itzela sortuko da Amutalde 12ko aretoan. 7 orduz musikak ez du etenik izango.
Bertsio gauaren ezaugarriei jarraiki ekipoa elkarbanatu eta kontzertu motzak eskainiko dituzte. Hala, taldeen arteko ahizpatasuna hauspotuko dute. Jai honetarako ordea, baldintza berri bat ezarri dute: abesti guztiek originalak izan behar dute, norberak sortuak.
Psilocyben egonkortutako taldeak arituko dira oholtza gainean: Krin, Tzar, Horzdun, Txavvo, Kid Es3 eta Kosmai Kosin. Horiei, entsegu lokaletik irten ez diren zenbait talde ere batuko zaizkie. Hala nola, Uranga eta Martinez, OnAVibe, Stoldak, Proiekt Hil eta Mala Necora. Bada saio honetarako espresuki taldea sortu duenik ere. Hun taldearen kasua da hori.
Jaialdian, halaber, P30 musika bilduma aurkeztuko dute. Iaz 30 urte bete zituen Psilocybe elkarteak eta urteurrena ospatzeko elkarteko 19 talderen abestiak batzen dituen diskoa osatu dute.
Larunbatean, hilak 8, arratsaldeko 17:30ean hasiko da lehen saioa eta sarrera borondatezkoa izango da.
