Play off-eko xake jardunaldiak jokatu dituzte asteburuan
Marlaxka Bk Gipuzkoako ligako goren mailan mantentzea lortu du. Marlaxka Ck lehen mailan jarraituko du eta Marlaxka Dk hirugarren mailan.
Apirilaren 20an jokatu ziren Gipuzkoako ligako azken partidak. Marlaxka Klubeko hiru taldeek etxean jokateko zortea izan zuten.Klubeko kideentzat aukera bikaina izan zen Marlaxkako partaiderik zaharrenari omenalditxo bat egiteko. 1937an jaiotakoa da 
Fernando Hoyos. “Azken urteotan, nekaezin jokatu ditu ahal izan dituen txapelketa guztiak. Osasun egoera delikatuan egon arren, larunbatean taularatzeko eskatu zuen. Hori pozik egin genuen eta aitortza hau emateko aprobetxatu genuen” azaldu dute klubetik.
Marlaxka Bk Arrasate Arlutz B izan zuen aurkari. Jaitsiera jokoan zegoen eta lehia gogorra izan ondoren, azkenean berdinketa lortu zuten. Play offeko partida bat jokatzeak dakarren “tentsio eta estresa” oso ondo kudeatu zituzten, eta hori, “azken asteetan asko hazi” direlaren erakusle dela esan dute. Berdinketa honekin play off-etako bigarren postuan amaitu dute.
Marlaxka Ck Arrasate Arlutz C taldea izan zuten aurkari. Lehia 1-3 galdu bazuten ere denboraldi osoan “xake onena lortzeaz bakarrik arduratu” direla nabarmendu dute klubetik.
Marlaxka Dk, berriz, Anaitasuna Kakute B taldearen aurka jokatu zuen. Asko borrokatu ondoren 0-4 galdu zuten. Hala ere urteko helburua bete dutela ziurtatu dute, “asko ikastea” eta “bikain” pasatzea.
