Uraren zikloaren kudeaketa integrala hobetuko duen programa aurkeztu dute
Hilaren 9an aurkeztu zuten Uramuga programa. Euskal Herriko hainbat administrazio eremuri eragingo dion proiektua da eta hiru urteko epea izango dute ezarri dituzten helburuak betetzeko.
Atzoko egunez, hilaren 9an, egin zuten Uramuga proiektuaren aurkezpen ekitaldia Txingudiko Zerbitzuak-en Atalerrekako Araztegian. Bertan izan ziren Hodarribiko, Irungo, Bidarteko, Miarritzeko, Berako, Lesakako eta Urdazubiko alkateak, Iparraldeko Euskal Herria Hirigune Elkargoko eta Nafarroako NILSA entitate publikoko ordezkariekin batera.
Aurkezpenean denek ala denek ur-baliabideen kudeaketa “eraginkorragoa” egitea “beharrezkoa” dela adierazi zuten. Aldaketa klimatikoaren ondorioz ura “bitarteko urriagoa” dela nabarmendu zuten eta beharra ikusi zutela “inbertsioak eta baliabideak optimizatzeko”. Gogoeta horren emaitza da Uramuga. Finean, uraren zikloaren kudeaketa integrala hobetzeko helburua du aurkeztu berri den proiektuak. Urtarrilaren 1ean abiarazi zuten eta hiru urteko epea izango dute ezarri dituzten helburuak betetzeko.
Honakoak dira proiektuak barne hartzen dituen hiru helburuak: gobernantza eredua hobetzea eta uraren kudeaketari dagokionez jarduera esparru bateratua ezartzea; partekatzen diren sistemak hobetzea marea biziei, euriteei eta bestelako arazoei aurre egiteko; eta herritarrentzako ezinbesteko baliabidea den ura zentzuz erabiltzea.
Euskal Herriko hainbat administrazio eremuri eragingo dionez, Navarra de Infraestructuras Locales, Communauté d’Agglomération Pays Basque, Txingudiko Zerbitzuak eta Bera, Lesaka, Baztan, Urdazubi eta Luzaideko udalek bat egin dute harekin. Guztira 3.627.435 euroko aurrekontua du eta Eskualde Garapeneko Europako Funtsak (EGEF) kofinantzatzen duen Interreg Poctefa programa europearraren barruan kokatzen da.
