Errugbiak Irungo kaleak hartu zituen asteburuan
Txingudi Rugby Club taldeak errugbi eskolen arteko nazioarteko topaketa egin du asteburuan eta Euskal Herriko zaleak gerturatu ziren.
Txingudi Rugby Club taldeak errugbi eskolen arteko nazioarteko topaketa egin zuen joan den asteburuan, eta Euskal Herriko txoko ezberdinetako errugbilariak gerturatu ziren Irunera: Baztan, Soragazteak, Arrasate, RGC Covadonga, Rugby Union Norte, RC Rioja, Sara-Senpere eta Emak Hor taldeetako jokalariak.
Goizeko 10:00etan hasi zituzten partidak. Bien bitartean, Plaiaundiko zelaiaren inguruan, Oiasso txarangak musika jarri zion jardunaldiari, boluntarioek txapelketako babesleek emandako produktuekin jokalarientzako poltsak prestatzen zuten bitartean. Eguerdi aldera, behin norgehiagoka guztiak bukatuta, jokalari, epaile, prestatzaile eta boluntarioek ohiko hirugarren denbora partekatu zuten eta parte hartzeagatiko sariak jaso zituzten.
Soraluzeko Soragazteak taldeko entrenatzaile batek azpimarratu zuenez, “gure bigarren urtea da topaketa honetan eta errepikatzeko prest! Oso aberasgarria da jatorri ezberdinetako taldeekin jokatzea eta are gehiago antolakuntza aldetik dena ondo doanean”.
Arratsaldean, Irungo kaleetan barna ibili ziren Oiasso txarangarekin. 17:00etan hasi zen jaiaren bigarren zatia Luis Mariano aldean, Marrubi goxoki-dendaren aurrean, eta denda honetako maskotarekin kontatu ahal izan zuten parte-hartzaileek.
Kalejirak Txingudiren beste babesleen egoitzetan egin zituen geldialdiak, Biok arropa-dendan eta Mari tabernan, Kale Nagusiko Txingudi Rugby Tabernan amaitu baino lehen. Errugbilari gazteek ez zuten nahikorik izan, dirudienez, minutu batzuk geroago San Juan harriaren inguruan “tokata” bat osatu baitzuten.
Xabi Sanchez, Txingudi Rugby Clubaren koordinatzailearen hitzetan, “horrelako ekitaldi bat antolatzeak lan asko dakar, baina klubak sasoi oso ona dauka eta badakigu gai garela hau aurrera ateratzeko”.
Argazkiak Gari Mendizabal eta Xabi Sanchezenak dira.
