Berritasunekin datoz BATen udalekuak
Ostegunetan, Artalekura joango dira, eta ostiraletan, taldekako olinpiada txikiak egingo dituzte. Izen ematea zabalik dago jada.
Atzotik zabalik da BATek Plaiaundin antolatzen dituen Atletismo Udalekuetan izena emateko epea. Aurtengoak ekaineko azkeneko astean hasiko dira eta abuztua bukaera arte iraungo dute, eta 4 eta 14 urte bitartekoentzat dira.
Aurtengo edizioak berritasunak izango dituela aurreratu dute antolatzaileek. Batetik, gurasoei galdetu ondoren, erabaki dute ordutegia zabaltzea eta 08:30etan hasiko dira orain, eta 14:00etan bukatu. Beste aldaketetako bat elikadurari dagokiona da. Hamaiketakoan fruta eta ura soilik eskainiko diete haurrei aurrerantzean, eta nahi duenak etxetik ahalko du eraman bestelako jakia.
Beste berritasunetako bat ostegunetan Artalekuko pilotalekura eta igerilekuetara egingo dituzten irteerak izango dira. Horrez gain, urte olinpikoa denez, ostiraletan taldekako olinpiada txikia egingo dituzte.
Kuoten prezioak ez dituzte aldatuko, eta gero eta aste gehiagotan parte hartu, deskontu handiagoa egingo dute. Ohiko beherapenak ere mantendu dituzte, hala nola, maiatzaren 31 baino lehen egindako matrikulazioei %10eko beherapena aplikatuko zaie, baita ere BATeko atletei, bazkideei eta anai-arrebak inskribatuta dauden kasuei.
Opari gisa, udalekuen kamiseta emango diete haur bakoitzari eta beste opari bat. Baieztatu dute jarduera guztiak euskaraz eta gaztelaniaz izango direla. Informazio gehiago jasotzeko, orrialde honetara jotzeko azaldu dute.
