Trafikoan eragin nabarmena lehen sektorearen mobilizazioagatik gaur
Biriatuko pasabidea bi noranzkoetan itxita egongo da 10:30etik 14:00etara eta A-8an eragin zuzena izango du, baita inguruko errepideetan ere.
Lehen sektorea bizirik aldarriarekin traktore elkarretaratzea egingo dute gaur A-8 autobidean, Biriatuko pasabidean hain zuzen ere. Itxierak eragin zuzena izango du trafikoan 10:30etik 14:00etara Eusko Jaurlaritzak jakinarazi duenez.
Hori dela eta, elkarretaratzeak irauten duen bitartean, Eusko Jaurlaritzak A8tik Ipar Euskal Herrira ez joateko gomendioa eman du.
Inguruan zirkulatu behar izanez gero, ordezko bideak erabiltzea, N-636, N-121 A (ñabardura batzuekin), GI20, eta abar. Inola ere ez erabili Ipar Euskal Herrirako noranzkoko A8 errepidea.
Kontuan izan behar da traktore-ilara bat Nafarroatik Behobiako mugaraino joango dela, eta, elkarretaratzea amaitzen denean, berriz jatorrira itzuliko direla. Horrek eragina izango du N-121 A errepideko trafikoan elkarretaratzearen joan-etorriko ibilbidean.Muga inguruko eskualdeei eragin diezaieke: Bidasoa, Oarsoaldea, Donostialdea eta Bortziriak.
