Alai fabrikako grebak %70 jarraipena izan du lehen egunean
Akordioa berritzeko negoziazioa iazko udaz geroztik blokatuta dagoela salatu dute ELA eta LAB sindikatuek. Ostiral arte luzatuko dute greba.
Gaur hasi dute hilaren 23ra luzatzea asmo duten greba Alai Extrusion Kimika sektoreko produkzioko langileek. Enpresak 85 langile ditu eta %70eko jarraipena izan duela grebak adierazi du Nerea Sainz ELA sindikatuko ordezkariak.
2022. urteaz geroztik ari dira enpresako akordioa negoziatu nahian, ELA sindikatuaren babes nagusiarekin, gehiengoa baitu enpresan. Baina, negoziatzeko borondate falta medio, langile asanbladak grebara joatea erabaki zuen hilaren 5ean. Langile asanbladan LAB eta ELA sindikatuen ordezkaritzak daude.
Halaber, akordioa erdiesteko bileretara giza baliabideetako langilea joan izana deitoratu dute, gerentea beharrean. Era berean, Sainzek onartu du greba erregistratu zutenean haiekin harremanetan jarri dela gerente arduraduna eta bilera batean agertu zela. “Ematen du orain borondatea aldatu dela, baina orain arte hutsa izan da erantzuna”.
Hitzarmenean KPIaren araberako soldata igoerak eskatzen dituzte, bai eta lanaldiak murriztea eta lan baimenetan hobekuntzak egitea. Esaterako, gaueko txandan lan egiten dutenek goizean goiz medikua izatekotan, lanetik lehenago irteteko aukera izatea babestu du Sainzek.
