BATeko zortzi atleta Espainiako Txapelketan izango dira
Gaurtik igandera bitartean Espainiako Txapelketa Absolutuak lehiatuko dira Ourensen. BATeko kideak une gozoan iritsi dira txapelketara, zazpik beren betiko marka onena lortuta bidaiatu baitute Galiziara.
Gaurtik igandera bitartean Atletismoko Espainiako Txapelketa Absolutuak lehiatuko dira Ourensen (Galizia) Bidasoa Atletiko Taldeko zortzi kideren parte hartzearekin. Zortziak, gainera, une gozoan iritsi dira txapelketara, zazpik beren betiko marka onena lortuta bidaiatu baitute Ourensera. Hauexek dira Espainiako Txapelketan arituko diren atletak:
- Iker Arotzena: Luzera jauzian, 7,80 metroko jauzi onenarekin.
- Victoria Briso: Konbinatuan, 3.706 punturekin.
- Elena Martin: 1.500 metrotan, 04:19,69ko denbora onenarekin.
- Malen Martinez: 60 metroko hesietan. 08,66 segundoko denbora onenarekin.
- Lorena Vives: Pertika jauzian, 4,01 metroko jauzi onenarekin.
- Carla Awen Martinez: 60 metrotan, 07,37 segundoko denbora onenarekin.
- Irune Muguruza: 400 metrotan, 55,83 segundoko denborarekin.
- Laia Olaskoaga: 200 metrotan, 24,88 segundoko denbora onenarekin.
Bidasoko Maratoi Erdia +10k
Hilaren 25ean, hau da, hurrengo igandean, Bidasoko I. Maratoi Erdia +10k lasterketa lehiatuko da. Astebete geratzen da probako izen-emate epea ixteko, -hilaren 23ko 13:00etan itxiko da-, eta BATek jakinarazi du inskripzio errekorra izango dutela, 1.200 lasterkari inguruk eman baitute izena aro berriko lehen proban. Irungo Maratoi Erdia +10k lasterketa Bidasokoa bilakatu da aurten, eta berritasunetako bat ibilbide aldaketa izan da. Klubak esan du inskripzioak erritmo handian doazela, eta 1.300 lasterkari inguru jasotzea aurreikusi dute. Maratoi erdian 730 korrikalarik eman dute izena jada, eta 10k-koan, 430ek.
Dortsalak hilaren 22tik aurrera jaso ahal izango dira Irungo Deportes Gonzalez kirol dendan. Hauexek dira dortsalak jasotzeko egunak eta ordutegiak:
- Hilak 22, osteguna: 16:00etatik 20:00etara.
- Hilak 23, ostirala: 10:00etatik 13:00etara eta 16:00etatik 20:00etara.
- Hilak 24, larunbata: 10:00etatik 13:00etara eta 16:00etatik 20:00etara.
Probaren egun berean ere jaso ahal izango dira dortsalak Irungo Uranzu frontoian, 08:15etik 09:30era.
