Azken egunak gorosti banaketan izena emateko
Hilaren 25a da egitasmoan parte hartzeko azken eguna, eta 2023an Irunen jaiotako haurrei eta haien familiei dago zuzenduta.
Irungo Udaleko Garapen Jasangarriko arloak gogorarazi du hilaren 25a dela gorosti banaketan izena emateko azken eguna. Etorkizuna gara. Gorosti bat, elkarrekin hazteko egitasmoaren zortzigarren ekitaldia da aurtengoa, eta 2023an Irunen jaiotako haurrek eta haien familiek parte hartu ahal izango dute. Gorosti banaketa martxoaren 16an egingo da udaletxeko arkupeetan.
Egitasmoan parte hartzeko, izena ematea beharrezkoa dela adierazi du udalak. Inskripzioak 010 telefonora deituta edo udalaren webgunearen bitartez egin daitezke. Izen-emate epea bukatuta, familia bakoitzari gorostia jasotzeko txanda bat emango zaio. Notifikazio hori posta elektroniko bidez bidaliko zaie familiei, eta landarea zein egun eta ordutan jaso beharko duten zehaztuko zaie.
