Mozorro lehiaketa irekia, Bidashopen iniziatibaz
Larunbat goizean egingo dute lehiaketa Luis Marianon eta banaka, binaka edo taldean parte hartu daiteke. Izen ematea ostegunean itxiko da.
Hirugarren mozorro lehiaketa antolatu du Bidashopek eta hilaren 10ean izango da Luis Marianon, 11:00etatik 13:00era. Lehiaketa irekia da eta izena emateko epea hilaren 8an bukatuko da, ostegun honetan, 20:00etan. Horretarako lotura honetan sartu behar da, nahiz eta berandu dabiltzanentzako lehiaketa baino ordu bat lehenago izena emateko aukera zabalduko duten berriro, 10:15etik 10:45era.
Goiz dibertigarria pasa nahi dutenentzako dela lehiaketa azaldu dute antolatzaileek eta banaka, binaka edota taldean parte hartu daitekeela zehaztu dute. Musika egongo da eta Disney-ren zaleentzako photocalla, besteak beste.
Kategoria bakoitzeko saria banatuko dute eta hiriko pertsona ezberdinek osatutako epaimahaiak baloratuko duena da “mozorroaren originaltasuna, karakterizazioa, konplexutasuna eta sormena”.
