Suteen aurkako helikopteroa, aurki
Hasiera batean, zerbitzuak Hondarribian, Sondikan eta Forondan kokatzeko ideia zabaldu bazen ere, oraindik guztiz zehaztuta ez dagoela argitu du Xabier Lopetegi Gipuzkoako Foru Aldundiko Lurralde Oreka Berdea-ko prentsa arduradunak.
Azaroaren 28ko diputatuen kontseiluan onartu zuten Euskal Autonomia Erkidegoari zerbitzua emango dion helikoptero baten kontratazioa egiteko hitzarmena. Orain Batzar Nagusietatik pasa beharko da; gero sinatu, eta azkenik, zerbitzuaren esleipenarekin martxan jarriko da Eusko Jaurlaritza. Ismael Mondragonen, Gipuzkoako Foru Aldundiko Mendiak eta Habitatak kudeatzeko zerbitzuburuaren arabera, esleipena aurten egitea da helburua.
Hasiera batean, zerbitzuak Hondarribian, Sondikan eta Forondan kokatzeko ideia zabaldu bazen ere, oraindik guztiz zehaztuta ez dagoela argitu du Xabier Lopetegi Gipuzkoako Foru Aldundiko Lurralde Oreka Berdea-ko prentsa arduradunak. “Hitzarmenak xehatzen duenez, neguan Bizkaia eta Gipuzkoan, eta udan Araban egongo da. Baina kokapen zehatza erabakitzeke dago oraindik”.
Eusko Jaurlaritzak eta Gipuzkoa, Araba eta Bizkaiko Foru Aldundiek suteak itzaltzeko helikoptero baten erabilera batera finantzatzeko lankidetza hitzarmena sinatu zuten. Gipuzkoak zerbitzuaren kostuaren % 27,52 finantzatuko du.
2022an 36 baso-sute izan ziren Gipuzkoan, eta 73 hektarea kaltetu ziren. 2023ko, urrira arte, 43 sute gertatu ziren, 55 hektarea kaltetu zituztenak. Helikoptero zerbitzu honi esker suteei “azkarrago, eraginkortasunez eta berme handiagoz” aurre egitea espero du aldundiak.
