Palestinaren alde bilduko dira hondarribiarrak bihar
Gernika-Palestina manifestuaren aldeko Hondarribiko talde batek antolatu du biharko mobilizazioa. "Berehalako su etena eta eraso guztien amaiera" eskatuko dute.
Bihar (asteartea, hilak 7) hilabete beteko da Palestinaren kontrako erasoa hasi zenetik, eta egun hori probestu nahi du Gernika-Palestina Deialdi Herritarrak mobilizazioak egiteko. Hemen ere kalera aterako dira hondarribiarrak, Gernika-Palestina manifestuaren aldeko herriko taldeak elkarretaratzera deitu baititu herritarrak. 19:00etan bilduko dira, udaletxean.
“Gazako eta oro har Palestinako egoera, 10.000 hildako baino gehiagorekin, gero eta larriagoa da, eta ez dirudi une honetan nagusi den gerra gero eta bortitzagoaren logika epe laburrean aldatu zenetik. Aitzitik, Israelgo Gobernuak Gazan lurreko okupazioa hasteko hartu duen erabakiak itzulera zaileko amildegi baten ertzean jarriko du gatazka”, salatu dute taldekoek.
Horregatik, ondorengo aldarrikapenak egingo dituzte biharko mobilizazioan (hitzez hitz):
- Berehalako su etena eskatzen dugu, eraso guztien amaiera eta zibilen bizia eta segurtasuna bermatzea. Halaber, Gazako zerrendaren setioarekin eta oro har, Palestinako lurraldearen gaineko mehatxuarekin bukatzea eskatzen dugu, bai eta laguntza humanitarioaren sarrera ahalbidetzea ere.
- Herritar palestinar eta israeldarrek bakean bizitzeko eskubidea dutela uste dugu.
- Konponbide baketsu eta negoziatua bilatzeko deia luzatzen diegu alde guztiei eta nazioarteko komunitateari; Nazioarteko Zuzenbidean eta NBEren ebazpenen betearazte
zorrotzean oinarritzen den konponbidea, alegia. - Horretarako premiazkoa da elkarrizketa prozesu bat abiatzea. Bake justu, egonkor eta iraunkorra helburu, nahitaezkoa da okupazioari amaiera ematea eta Palestinaren
autodeterminazio eskubidea bermatzea.
