Elkarretaratzea, bihar, Gernika-Palestinak deituta
San Juan plazan, udaletxearen atarian elkartzeko deia egin dute 19:00etarako. "Konponbide baketsu eta negoziatua bilatzeko deia" egingo dute.
Palestinaren aldeko elkarretaratzea Irunen Gernika-Palestinak egindako deiarekin bat egin eta bihar elkarretaratzea egingo dute Irungo San Juan plazan herritarrek. Euskal Herri osora zabaldu den deialdia da eta goizean ikastetxeen atarian bilduko badira, arratsaldeko 19:00etan udaletxe aurrean elkartuko dira. Bihar, gainera, hilabete beteko da Israelek Gazaren kontrako bonbardaketa geldiezina abiatu zuenetik.
Urriaren 21ean manifestazio nazionala egin zuten Donostian, Gernika-Palestina taldeak deituta, eta orduan ateratako irakurketari eutsi diote oraingoan ere. Honako hauek dira egiten dituzten aldarrikapenak:
1. Berehalako su-etena eskatzen dugu, eraso guztien amaiera eta zibilen bizia eta segurtasuna bermatzea.
2. Halaber, Gazako zerrendaren setioarekin eta, oro har, Palestinako lurraldearen gaineko mehatxuarekin bukatzea eskatzen dugu, bai eta laguntza humanitarioaren sarrera ahalbidetzea ere.
3. Herritar palestinar eta israeldarrek bakean bizitzeko eskubidea dutela uste dugu.
4. Konponbide baketsu eta negoziatua bilatzeko deia luzatzen diegu alde guztiei eta nazioarteko komunitateari; Nazioarteko Zuzenbidean eta NBEren ebazpenen betearazte zorrotzean oinarritzen den konponbidea, alegia.
5. Horretarako premiazkoa da elkarrizketa prozesu bat abiatzea. Bake justu, egonkor eta iraunkorra helburu, nahitaezkoa da okupazioari amaiera ematea eta Palestinaren autodeterminazio eskubidea bermatzea.
