Biok Txingudi asteburuan garaile, nabarmen
Gaztedi B garaitu duten Plaiaundikoek 39-0 ezarriz markagailuan. Hasieratik izan zuten menderatuta partida.
Asteburuan Gaztedi B jaso du etxean Biok Txingudik eta garaipena lortu zuten markagailuan 39 eta 0 markatuz. Sailkapenean 11 puntu gehitu dituzte.
Partida hasieratik menderatu zuen aurkaria Biok Txingudik, lehenengo jokaldian Enara Arrutik entsegua eta eraldaketa lortu zuelako. Hasi eta 5 minututara bost puntu gehitu zituen markagailuan Naroa de la Fuentek, 12 eta 0 ikus zitekeen.
Plaiaundin baloiaren jabetza etxekoena izan da denbora guztian eta horrek “erasoa garatzeko aukerak” eman zizkietela dio Biok Txingudik. 7 minutu geroago de la Fuentek bigarren aldiz puntuak bildu zituen eta Arrutik eraldaketa egin zuen. Hori gutxi ez, eta atsedenaldia baino lehen, Onintza Burgerak eta Miren Fernandezek entsegu bana egin zuten 29 eta 0ekoa finkatzea lortu zuten.
Bigarren zatia intentsitatea baxuagoa izanda jokatu zuten. Zigor kolpe gehiago egin zituzten eta Gaztedik metroak aurreratzeko probestu zuen. Dena den, Plaiaundikoak defentsan ondo aritu ziren eta gasteiztarren saiakerak zapuztea lortu zuten.
Bien bitartean, gainera, Txingudiko Arrutik aldea handitu zuen beste entsegu baten bidez 34 eta 0 markatuz. Azkeneko marka Miren Fernandezek egin zuen. Puntuak gora eta behera, Leire Muñozek aldi baterako kanporaketa jaso du.
