Gorka Irisarrirena, Erdi Aroko bigarren pintxo onena
Hondarribiko Danontzat gastrotekako sukaldariak txoko bat egin du beste behin XI. Erdi Aroko Pintxo Lehiaketako podiumean. 'Erromesa' izeneko pintxoarekin eskuratu du bigarren saria.
Gorka Irisarri. Danontzat Gastrotekako sukaldeburua, pintxoetarako erabiltzen dituen trena eta euskarrietako batzuekin Hondarribiko Danontzat gastrotekak beste sari bat poltsikoratu du. Herrian bertan jokatu berri den XI. Erdi Aroko Pintxo Lehiaketan parte hartu du gastrotekako Gorka Irisarrik, eta podiumean txoko bat egiteko gai izan da beste behin. Ia-ia 2012koa errepikatzeko gai izan da Irisarri, garaile izan baitzen orduko hartan.
Erromesa izeneko pintxoarekin eskuratu du bigarren postua sukaldariak. Txapelketa berezia izan da, ezin izan baitute XV. mendearen ondoren ezagutu eta erabiltzen hasi ziren osagairik erabili. Hori bai, teknika modernoak erabili ditu Danontzat-eko sukaldariak.
Klink elkarteko sukaldean izan zen lehia.
