Juan Thalamas Labandibarreko 55.a erosiko du udalak
Ekimena inguru osoa berdegunez eta pasealekuz betetzeko egitasmoaren baitan egingo dute. Udan, Bidasoara begira dagoen egonaldi eremua eraiki dute.
Udan zehar Juan Thalamas Labandibar hiribidean begiratoki eta egonaldi eremua egokitu zuen Irungo Udalak, Bidasoa ibaiaren ertzean. Lan horiek egokitzeko ia 79.000 euroko aurrekontua baliatu zuten, eta bertan berdegunea atontzeaz gain, bankuak eta etzaulkiak jarri zituzten.
Aurrerantzean, bada, udalak beste urrats bat emango du inguru osoa berdegunez josteko. Hala, kaleko 55. zenbakidun eraikina erosiko du udalak, eta horrela lekua egingo diote bidegorri nahiz oinezkoen pasealekuari. Horretarako, datorren hilaren 29ko, ostiraleko, osoko bilkuran kredituen aldaketa onartuko dute, 800.000 euroko gehikuntzarekin. Horrela, desjabetze-akordioa itxi eta udala partzela eta eraikinaren jabe bihurtuko da. “Urteak daramatzagu hiria biziberritzeko eta gure ibaiari begirada integratzailea emateko etenik gabe lanean” adierazi du Miguel Angel Paez, Hirigintza ordezkariak.
Bestela, aipatu eremuan autoen kontzesionario zaharra zegoen eraikina eraisteko lanak abiatu ditu udalak udan zehar.
