BATeko kideak hondakinen bila itsasoratu dira
Joan den ostegunean, BATeko kirolariek hondakin bilketa egin zuten itsasoan, Mater museoa eta Ekoetxea lagun.
BATeko kideak, Mater Museoaren atun-ontzian. Duela hainbat hilabete, Mater museoko eta Ekoetxeko ordezkariak Bidasoa Atletiko Taldeko (BAT) ordezkariekin bildu ziren, proposamen bat artean: kirol taldeko kideek hondakin bilketa saio batean parte har zezatela, ingurumenaren zaintzaren beharra gazte eta kirolarien artean hedatzeko.
Hori horrela, joan den abuztuaren 31n, ostegunean, BATeko berrogei kide inguru Mater museoaren atun-ontzi batera igo eta itsasoratu ziren, klubeko hainbat langile eta entrenatzaileekin batera. Goiz eta arratsaldez, Txingudiko badia eta Hondarribiko inguruetan barrena aritu ziren, itsasoko hondakinak jasotzen.
“[BATeko kideek] ekimen hau helburu ekosozial eta etikoak dituen denboraldi-aurreko jarduera gisa kontsideratzea nahiko genuke; hondakinak jasotzea batere erreza ez dela kontzientziatu, eta ondorioak dituen errealitatea dela ikustarazi” azaldu dute Euskadiko ingurumen-zentroen sareko kideek.
Bere aldetik, BATeko ordezkariek horrelako ekimenak “garrantzitsuak” direla uste dute, eta osteguneko saiotik “kirolariek bere gain hartu dutela hondakinen murrizketa bultzatzeko konpromisoa”. Ibon Muñoz BAT taldeko gerentearen hitzetan: “Horrelako jarduerak oso didaktiko eta beharrezkoak dira gazteenentzat. Hondakinen bilketan parte hartzeko aukera eskertu nahi dugu”.
