Antzuolako Alardeak jasoko du aurtengo Hondarribia Berdintasunaren Saria
"Tradizioa biziberritzearekin batera genero berdintasuna eta arrazakeriaren kontrako borroka jorratu dituztelako" sarituko dute. Taldeak egindako lana "eredugarria" izan dela dio Jaizkibel Konpainiak.
Jaizkibel Konpainiak aurtengo Hondarribia Berdintasunaren Saria nork jasoko duen jakinarazi du. Antzuolako (Gipuzkoa) Alardeari emango diote bederatzigarren saria, Alardea biziberritzeko taldeari hain zuzen, “Antzuolako udalari eta prozesu guztian parte hartu duten herritarrei, tradizioa biziberritzearekin batera genero berdintasuna eta arrazakeriaren kontrako borroka jorratu dituztelako”. Talde honek egindako prozesua “eredugarria” izan dela erantsi dute konpainiakoek: “esperantza printza da gure herriarentzat”.
Sari honekin Jaizkibelek “Hondarribia berdintasunaren aldeko hiria dela eta segregaziotik haratago lan egiten duen tokia dela ikusarazi” nahi du, hori da asmo nagusia.
Arantxa Urretabizkaiak, Fermin Muguruzak, Garbiñe Biurrunek, Nieves Alzak eta Maddalen Iriartek osatu dute aurtengo epaimahaia.
Igande honetan (irailak 3) izango da sari banaketa, Itsas Etxean, 18:30ean. Hau bukatuta, Jaizkibelek bere bigarren entsegua egingo duela iragarri du.
