Hilaren 25erako antolatu dute Hondarribiko IV. Argazki Rallya
Ttopara Kultur Elkarteak antolatzen du Argazki Rallya. Aurten, bigarrenez, Aritz Aranburu oroituko dute. Egunean bertan inskribatu ahal izango da. Edonork parte hartu dezake.
Jose Mari Sanz Ttopara Kultur Elkarteko presidentea, Ortzi Alonso zinegotzia eta Floren Portu Ttoparako kidea. Hilaren 25erako antolatu du Ttopara Kultur Elkarteak Hondarribiko IV. Argazki Rallya. Aurten, bigarrenez, Aritz Aranbururen oroimenenezko rallya izango da.
Antolatzaileek azaldu dutenez, lehiaketaren sorrera ez zen lan samurra izan; izan ere, duela lau urte izandako izurriteari eta Ttopara elkartearen sortzaileetako baten heriotzari aurre egin behar izan baitzioten.
Argazki Rallya goizeko 10:00etan hasiko da. Aldez aurretik, Kasino Zaharrean parte hartzeko izen emate orriak egongo dira, 09:00etatik 10:00ak bitarte. Nahi duenak Ttopararen webgunean ere izena emateko aukera izango du hilaren 22ra arte. Inskripzio orokorra 10 eurokoa da. 16 urte beheragokoek, berriz, 5 euro ordaindu beharko dituzte.
Egitaraua eta betebeharrak
10:00etan ibilbideari hasiera eman aurretik kontrolerako argazki bat egongo da. Parte hartzaileek kamera digital bat eta txartel formateatua eraman beharko dute. Gehienez 36 argazki aurkeztu ahal izango dira JPG formatuan. Horiek, 13:00etatik 14:00etara entregatu beharko dira Kasino Zaharrean bertan. Hori eginda, azkeneko pausoa egitea geratuko zaie lehiakideei: hurrengo helbidera gai bakoitzerako aukeratutako argazkiaren zenbakia adierazi beharko da. Horretarako epea abuztuaren 3a izango da gaueko 24:00etan.
Sariak
Argazkilaritza munduan adituak direnek osatuko dute aurtengo epaimahaia. Sari banaketa irailaren 1ean egingo da, 20:00etan. Oraindik ekitaldiaren lekua zehazteke dago.
- Lehen saria: bildumarik onenari emango diote. Irabazleak diploma eta 200 euro jasoko ditu.
- Bigarren saria: bigarren bildumarik onenari emango diote. Diploma eta 150 euro eskuratuko ditu.
- Hirugarren saria: hirugarren bildumarik onenari emango diote. Diplomaz gain, 100 euro bilduko ditu.
- Herriko argazkilari bozkatuenak ere izango du saria. Kasu honetan 100 euroko hobaria jasoko du.
- Azkenik, gazteen saria banatuko dute. Irabazleak 80 euro jasoko ditu.
