Ezingo dituzte droneak erabili migranteak kontrolatzeko
Polizia frantsesa ekainaren 27an hasi zen Irun eta Lapurdi arteko muga dronekin kontrolatzen, 22 kilometroko perimetroan. Paueko Auzitegiak arrazoi eman die migranteen defentsan dabiltzan abokatuen errekurtsoari.
Iragan astean Santiago zubia itxi zuten hainbat herritarrek migranteen “ehiza” bukatzeko. Orduan, udan migranteak kontrolatzeko Frantziako Polizia droneak baliatzen hasiko zela abisatu zuten, eta atzo Antxeta Irratiak jakinarazi zuen Paueko Auzitegian migranteen defentsarako abokatuek aurkeztutako errekurtsoak aurrera egin duela. Ondorioz, ezingo dituzte droneak erabili. Demanda Etorkinekin Diakite federazioak eta Gipuzkoako SOS Arrazakeriak-ek aurkeztu zuten.
Ekainaren 27an hasi ziren droneak erabiltzen migranteei segika, Hendaia, Urruña, Biriatu eta Irun artean. Antxeta Ilazki Ortego abokatuarekin bildu da eta gailuen erabilera “berehala” bertan behera utzi beharko dutela iragarri du, “giza eskubideen kontrakoa delako”. Hilaren 26ra arteko baimena zuten poliziek migranteen kontrolerako aireko gailuak erabiltzeko.
SOS Arrazakeria pozik azaldu da ebazpenarekin: “Erakusten du posible dela babesa aurkitzea oinarrizko eskubideak babesten dituzten legezko bermeetan, Frantziako Gobernuak eskubide horien kontrako jarduketen aurrean”. Abokatuek egindako lanari, gainera, balioa eman dio elkarteak, eta migranteen aldeko lan horrekin jarraitzeko prest azaldu da, “Frantziako Gobernuak behin eta berriz urratzen baititu Euskal Herrian bizi diren edo bertatik ibiltzen diren pertsonen oinarrizko eskubideak”.
SOS Arrazakeriak berriro eskatu die Frantziako eta Espainiako estatuetako agintariei errespeta dezatela “pertsona guztiek duten zirkulazio askerako eskubidea, eta zehazki, Irun eta Hendaia artean mugitzeko eskubidea”. Aldi berean, “arraza profilagatik ezarritako polizia kontrolak” bertan behera uzteko eskatu du elkarteak, “poliziek sistematikoki egiten baitituzte”.
