Etorbidearen zubiaren egoerak hautsak harrotu ditu Irunen
Frantziako Tourraren etorreragatik, Etorbidearen zubia ireki zuten astelehen goizean. Astearte goizean, baina, zubia berriro itxi zuten. Azken egunetan aldarrikapenen epizentro bihurtu da.
Frantziako Tourreko hirugarren etapak Zornotza eta Baiona lotu zituen astelehenean. Lasterketako pelotoia Irungo Santiago zubitik igaro zen Hendaiara, eta Tourraren etorreraren harira, bi urtez itxita daraman Etorbidearen zubia ireki zuten astelehen goizean Pirinio Atlantikoetako Prefekturaren aginduz. Jose Antonio Santano Irungo alkatea eta Kotte Ezenarro Hendaiako alkatea bertan ziren irekieraren momentuan, eta «behin betiko» irekiera izatea espero zutela aldarrikatu zuten.
Astearte goizean, baina, irekieratik soilik egun batera, Etorbidearen zubia berriro itxi zen, zubia irekitzea baimentzen zuen Pirinio Atlantikoetako Prefekturaren baimena astelehenerako zelako soilik, Tourraren etorreragatik. Bi urtez itxita izan den pasalekua 24 orduz egon da irekita, eta momentu honetan itxita dago berriz. Orain arte jarrita egon den hesia berrezarri dute, oinezkoentzako pasabidea moztuz. Horrez gain, David Nuño Irungo Elkarrekin koalizioko udal bozeramailea zubian izan zen astearte goizean, eta egiaztatu zuen hesiak «indartu» dituztela. Tourra pasata eta hesiak berrezarrita, Santiago zubiko Frantziako Poliziaren etxola ere berriz instalatu dute.
Zubiaren itxiera berriak Irungo eta Hendaiako alkateen haserrea piztu du, eta Jose Antonio Santanok eta Kotte Ezenarrok ixteko erabakia ulertzen ez dutela adierazi zuten asteartean: «Ez dugu ulertzen erabakia. Bidasoaren gaineko muga horretan gertatzen ari dena XXI. mendeko Europan zentzurik ez duen anomalia bat da, eta ez dugu inolako justifikaziorik ikusten pertsonen joan-etorria eragozten jarraitzeko, areago 500 kilometro luze den mugan horrelako beste kasurik ez dagoenean».
Asteartean egindako agerraldian, bi alkateek argi utzi zuten Etorbidearen zubiaren irekiera aldarrikatzen jarraituko dutela. Santanok eta Ezenarrok adierazi zuten ez dutela baztertzen «maila sozial eta politikoan» aldarrikapen batzuk egitea «Irungo eta Hendaiako bizilagunak iraintzen dituen erabaki lotsagarri hori konpontze aldera».
Hori dela eta, egoera salatzeko, elkarretaratzera deitu dute bi alkateek gaurko (ostirala). Zubian bertan bilduko dira, 18:00etan. Azken egunetan jazotakoak hautsak harrotu ditu, eta gaurkoa ez da antolatu den elkarretaratze bakarra. Balazta elkartea asteazkenean mobilizatu zen zubiaren irekiera eskatzeko, eta atzo Bidasoa Etorkinekin, Irungo Harrera Sarea, Diakité-Etorkinen Federazioa, Ongi Etorri Errefuxiatuak, Bagera-Nous Sommes, SOS Arrazakeria, BIZI, LAB, FSU eta Solidaires elkarteak bildu ziren han.
«Bidasoa ez da muga, zubia baizik»
Frantziako Tourra astelehenean iritsi zen Bidasora, eta pelotoiaren etorreraren harira, jarduera bereziak antolatu zituen Gure Eskuk Irunen, «bi aldeetan euskaldunak bizi garela eta aldarrikapen ugari dituen herria garela erakusteko». Bidasoa zubia dela, eta ez muga, aldarrikatu zuten: «Tourreko antolatzaileentzat bertan bukatzen da Espainiako zatia eta Frantziara sartuko da lasterketa. Guretzat dena da Euskal Herria, Bidasoa ez da muga, zubia baizik, eta herri honen jarraipena irudikatuko dugu».
Topaketa 12:00etan izan zen, Irungo Santiago frontoian, eta bertatik kalejiran joan ziren Etorbidearen zubira Pirritx, Porrotx eta Marimotots pailazoekin. Etorbidearen zubira iritsi zirenean, Frantziako Poliziak giza-hesi bat egin zuen, eta ezin izan zuten Hendaiara pasa. Gure Eskuren martxa «manifestazio bat» zela erabaki zuen poliziak. Ikurrinak, baina, Irunen nahiz Hendaian ikusteko aukera izan zen; Bidasoaren gainaldea librarazi zuen poliziak, Tourraren aitzakiarekin.
