X. Txapelaundi Saria jasotzeko hautagaiak aurkez daitezke
Sariketa horrek Alde Zaharra-San Juan auzoko bizilagunak eta auzoarekin lotura estua duten pertsonak aintzatestea du xede. Hautagaiak hilaren 23ra arte aurkez daitezke, eta saria abuztuaren 19an emango dute.
Iazko Txapelaundi Saria. Argazkia: Alde Zaharra-San Juan Auzo Elkartea. Abuztuaren 19an Alde Zaharra-San Juan Auzo Elkarteak X. Txapelaundi Saria emango dio auzoko bizilagun edo kolaboratzaile bati, ermitan ospatuko den eukaristiaren ondorengo ekitaldi berezi batean.
Txapelaundi Saria 2014an sortu zen, eta aurtengoa izango da sariketaren hamargarren ekitaldia. Txapelaundiren xedea da auzoko bizilagunak eta auzoarekin lotura estua duten pertsonak aintzatestea, “beren ekintzen bidez Alde Zaharra-San Juan eremu eta arlo desberdinetatik bizitzeko leku hobea egiten laguntzen baitute”.
Auzo elkarteko kideek zehaztu dute pertsona askok “merezi” dutela errekonozimendu hori, eta aurten herritarrei zabaldu nahi diete saridun izan daitezkeen pertsonen izenak proposatzeko aukera. Hori dela eta, parte hartu nahi dutenei, pertsonaren izena eta bi abizenak eta izendapena justifikatzen duen kontakizun txiki bat helaraztea eskatu diete. Hautagaitza horiek aurkezteko azken eguna hilaren 23a da (igandea).
Hautagaitzak hainbat modutara helaraz daitezkeela jakinarazi dute auzo elkartetik: posta elektronikoz, lokal sozialeko postontzian utziz (Jesus kalea, 9), Alde Zaharra-San Juan Auzo Elkartearen sare sozialen bidez edo auzo elkarteko arduradunei emanez.
Aurten, gainera, Xantalen danborrada itzuliko da abuztuaren 19an, eta auzoko kaleak girotuko ditu. Auzo elkartetik danborrada jendetsua izatea nahi dute, eta bertan parte hartzea animatu dituzte herritarrak.
