Irungo Udalak jaietan ez dela erasorik erregistratu dio, baina lau erasoren salaketa publikoak egin dira
Atzo egin zuen jaien balorazioa udal gobernuak, atalez atal, eta eraso matxistei buruz adierazi zuten ez zela inolakorik erregistratu haiek ahalbidetutako zerbitzuetan. Baina, lau eraso salatu ziren publikoki jaiak iraun bitartean, Bidasoko Itaiaren eta HITZAren bitartez.
Udalak indarkeria matxistaren biktimei zuzentzen zaien arreta eta akonpainamendu zerbitzu bat eskaini zuen, prebentzio gisa eta eraso bat gertatzekotan laguntza eskaini ahal izateko. Baieztatu dute “ez dela dei bakar bat ere erregistratu, ezta Whatsapp mezurik ere arreta telefonoan jaso ere”.
Baina, ekainaren 22 gauean San Juan plazan jazo zen eraso matxista baten bideoa egin zen publiko. Bertan, alarde baztertzaileko kideek osatzen duten konpainia ez ofizial ezta formal bateko kideak joan daitezela, joan daitezela oihukatzen ageri dira, ikusten ez diren eta plazan txilibituarekin zeuden bi neskari. Momentu batean Cara al sol abestia ere jotzen du batek. (Herrian, kubata konpainia bezala da ezaguna aipatutako konpainia, eta alarde baztertzailekoek entseguak bukatzean batzen dira, modu informalean festa segitzeko asmoarekin).
HITZAk biktima horiekin hitz egin zuen eta baieztatu egin zuten “emakumeak garelako” gertatu zitzaiela erasoa. Beraz, indarkeria sexista eta matxista kasu bat gertatu zen, gutxienez, hirian jaien testuinguruan.
Bere bidetik, Bidasoko Itaiak indarkeria matxistari aurre egiteko protokoloa ondu zuen eta horren barnean telefono bat jarri zuten eskura eraso baten aurrean erantzuna edota laguntza behar izatekotan.
Udalaren esanen kontrara, hiru erasoen berri izan zuen taldeak. Lehena, ekainaren 17 gauean izan zen Irungo taberna batean; bigarrena, ekainaren 24 gauean izan zen, gizon batek “neska bat etxera jarraitu zuen, garrasika beldurtzen zuen bitartean”; eta hirugarrena, ekainaren 28 gauean gertatu zen, txosnen eremuan. Horiek guztiak haien Instagram eta Twitter kontuetan jaso ditu antolakundeak.
Salaketak ez dira zenbakiak eta Itaiak eraso bakoitza publiko egin duenean irakurketa kaleratu du: “Oraindik ere gure aurkako erasoek errealitate izaten jarraitzen dute, eta jai giroan are gehiago nabarmentzen dira. Hala, jazarpen eta biolentzia jarrerak normalizatu egiten dira. Horren aurrean, berebiziko garrantzia du eraso matxistak salatzeak eta erasotzaileei aurre egiteak. Indarkeria matxista orori aurre egin! Erasotzaileen inpunitaterik ez!”.
