Real Unionek zortzi lagunarteko jokatuko ditu denboraldi aurrean
Egun gutxi barru jarriko da martxan talde txuri-beltza. Aurtengo sasoia prestatzeko zortzi lagunarteko iragarri dituzte. Azken egunetan fitxaketak, bajak eta kontratu luzapenak jakinarazi ditu klubak.
Argazkia: Real Union. Uda aurrera doa, eta geroz eta gutxiago falta zaio Real Unioni martxan jarri eta 2023-2024 sasoia prestatzen hasteko. Entrenatzaile berriarekin hasiko du talde txuri-beltzak aurtengo denboraldi aurrea, Iñaki Goikoetxeak taldea utzi eta bere ordez Fran Justo prestatzaile galiziarra fitxatu baitu Real Unionek. Bigarren Mailako Lugo da galiziarrak entrenatu zuen azken taldea, eta urtebeteko kontratua sinatu du irundarrekin.
Aurtengo denboraldian salbazioa ligako azken partidan lortu ondoren, txuri-beltzak aurten ere Espainiako Lehen Federazioko Mailako lehen multzoan arituko dira. Denboraldia abuztuaren 26ko eta 27ko asteburuan hasiko du Real Unionek. Honakoak izango dira txuri-beltzen arerioak beren multzoan: Arenteiro, Lugo, Teruel, Sabadell, Fuenlabrada, Rayo Majadahonda, Osasuna B, Leongo Cultural, Bartzelona B, Nastic, Celta B, Deportivo, Real Sociedad B, Logroñes, Ponferradina, Tarazona, Sestao River, Cornella eta Unionistas Salamanca.
Sasoia prestatzeko, zortzi lagunarteko partida iragarri ditu klubak. Lehena Zarautzen jokatuko dute hilaren 22an, Eibarren aurka. Azkena, aldiz, abuztuaren 19an lehiatuko dute Guardian (Araba), Logroñesen kontra. Hona hemen txuri-beltzen denboraldi aurreko neurketak:
- Uztailak 22: Eibar-Real Union (Zarautz).
- Uztailak 29: Real Union-SD Logroñes (Gal).
- Abuztuak 2: Real Union-Girondins B (Gal).
- Abuztuak 5: Sestao River-Real Union (Noja, Kantabria).
- Abuztuak 9: Real Union-Pasaia (Gal).
- Abuztuak 12: Alaves B-Real Union (Gasteiz).
- Abuztuak 16: Real Sociedad B-Real Union (Zubieta).
- Abuztuak 19: UD Logroñes-Real Union (Guardia, Araba).
Iazko taldearekin alderatuta, aldaketak egongo dira taldean. Klubak jakinarazi berri du Nacho Sanchez eta Fede Andrada jokalariek ez dutela Real Unionen jarraituko datorren denboraldian, eta klubak onena opa die etorkizunerako. Txuri-beltzek, baina, bi fitxaketa iragarri dituzte gaur bertan: Asier Cordoba eta Joseca. Cordoba ezker hegalean jokatzen duen aurrelaria da eta Logroñesetik dator. Joseca, aldiz, ezker hegaleko atzelaria da, eta Arenteiro taldetik fitxatu du Real Unionek.
Bestalde, klubak aditzera eman du Julen Azkue, Jagoba Beobide, Ivan Perez eta Unai Agirre jokalariek urtebetez luzatu dutela kontratua Real Unionekin, eta talde txuri-beltzean izango dira aurtengo denboraldian.
Azkenik, Real Unionek martxan du jada 2010 eta 2014 urteen artean jaiotako umeen udako campusa. Asteartean, hilak 4, ekin zioten, eta hilaren 28ra arte luzatuko da. Txangoak, irteerak, bisitak, hitzaldiak, proiekzioak edota jolasak egiten dituzte, goizez, 09:00etatik 13:00era.
