Irun eta Merida, kultura eta arkeologiaren bidez lotuta
Irunek eta Meridak lankidetza hitzarmen bat sinatu dute. Ostegunetik aurrera 'Pvro Teatro' aldi baterako erakusketa egongo da ikusgai Oiasso Museoan, Dies Oiassonis jaialdiaren egunetan.
Dies Oiassonis erromatar jaialdia gainean da, hilaren 13tik 16ra Irungo kaleak hartuko baititu. Jaialdiaren atarian, Jose Antonio Santano alkateak, Nuria Alzaga Irungo Udaleko Kultur ordezkariak eta Pedro Blanco Meridako Hiri Monumentalaren Partzuergoko gerenteak Oiasso Museoan aldi baterako ikusgai egongo den balio arkeologikoko pieza bat aurkeztu dute.
Jesus Cimarro Meridako Antzerki Klasikoaren Nazioarteko Jaialdiaren Fundazioko zuzendaria ere Irunen izan da. Gaur Meridako Hiri Monumentalaren Partzuergoarekin hitzarmen bat sinatu du Irungo Udalak, Meridako jaialdiarekin “harremana estutuz”.
Bi hirien lankidetzaren esparruan eta Dies Oiassonis jaialdiaren testuinguruan, iaz ‘Merida. Theatrum Mundi’ erakusketa egon zen ikusgai Oiasso Museoan. Lankidetza horrek bidea egiten jarraituko du, eta ostegunetik aurrera (hilak 13) ‘Pvro Teatro’ aldi baterako erakusketak iazkoaren erreleboa hartuko du. ‘Medea’ antzerki emanaldia ere antzeztuko dute.
Erakusketa berria lau esparrutan antolatzen da: Meridako antzoki erromatarraren super egitura eszeniko bat; botere publikoko espazio bat; sinbolo pribatuak dituen eremu bat; eta grinen agertokia XX. mendeko antzokiaren funtzionamenduan.
‘Pvro Teatro’ erakusketa hamabost interpretazio panelek eta antzokiaren irudiek osatzen dute. Horrez gain, aparteko pieza arkeologiko bat ere ikusgai egongo da Oiasson: marmol zuriko esfinge baten bulto biribileko eskultura. Oiassotik jakinarazi dute esfinge hori Oiassok hamazazpi urteko ibilbidean inoiz erakutsi duen “pieza aipagarrienetako bat” dela.
Irungo Udalak eta Meridako Hiri Monumentaleko Partzuergoak komodatu bat sinatu dute, eta horren bidez, Meridak hamabost interpretazio panelak eta pieza arkeologikoa doan utzi dizkio Iruni erakusketa antolatzeko. Egitasmo horrek Gipuzkoako Foru Aldundiaren laguntza ere baduela adierazi dute.
