Howdy Bluegrass taldeak izen bereko diskoa euskaratu du
2020an kaleratu zuen euskal taldeak Howdy Bluegrass diskoa. Euskarazko bertsioa online jarri dute entzungai: Youtuben, Spotify-n eta Bandcamp-en dago eskuragarri.
Howdy Bluegrass taldea oholtzan. 
Euskarazko bertsioaren azala.
2012an sortu zen Howdy Bluegrass talde euskalduna. Jon Arzelusek (kontrabaxua), Urbil Artolak (dobroa), Jose Mari Pulidok (baxua) Julen Maestrok (akordeoi diatonikoa) eta Gorka Arranzek (kantaria) osatzen dute, eta bereziki, 1940. hamarkadan Bill Monroek sortu zuen bluegrass estiloan aritzen den taldea da.
2020an kaleratu zuten beren lehen diskoa, taldearen izen bera duena. Ingelesezko abestiekin osaturiko diska izan zen, “taldeko abestiak idazten zituenak hala egin zituelako” azaldu du Artolak. Pandemia geroztik, testu horiek euskaratzeko lanean aritu dira eta duela gutxi argitaratu zuten. Howdy Bluegrass-en euskarazko bertsioa entzungai dago onlineko zenbait musika plataformatan: Youtuben, Spotify-en eta Bandcamp-en.
Azken urteetan hainbat emanaldi eman ditu taldeak, besteak beste, 2016ko Donostiako Jazzaldian; Donostiako Aste Nagusian 2016 eta 2017an; Getxo Rustyc Festen 2016, 2017 eta 2018an; eta Usopop jaialdian 2017an. 2020an, gainera, Folkez Blai lehiaketaren sari nagusia eskuratu zuten.
