[Bideoa eta argazkiak] Asun Casasola: "Borrokan segitu behar dugu, mundu hau hobea izan dadin"
Esker hitzak eman ditu Asun Casasolak bere alaba Nagore Laffagen hilketaren 15. urteurrenean. Borrokan segitzeko deia ere egin du, "mundu hau hobea izan dadin".
Iaz, Nagore Laffage Casasola oroitu zuten bere izena daraman parkean. Gaur, duela 15 urte erail zuen Diego Yllanesek Nagore Laffage irundarra Iruñeko sanferminetan, emakumeak gizonarekin erlazio sexualak eduki nahi ez zituelako. Ordutik, urtero oroitzen dute Laffage Iruñeko Astelehen Lilakoek bultzatuta, eta Irunen ere hainbat omenaldi egin izan dira. Horietan guztietan Asun Casasola, biktimaren ama egon izan da.
Bide horretan, M8 Asanblada Feministak gaur Laffage oroitzeko ekitaldia antolatu du. Herritarren erantzuna handia izan da, parkea bete egin da. Jose Antonio Santano alkatea eta Cristina Laborda Berdintasun ordezkaria bertan izan dira ere.
Ekitaldia txalaparta jotzearekin hasi da eta segidan, manifestua irakurri dute Maria Valientek eta Irene Kastezubik. Azken hamabost urteetan “egoera gutxi aldatu dela” salatu dute “behin eta berriz kolpatzen gaituen terrorismo matxistaren ondorioz, ehunka izen batzen zaizkio Nagoreri urtero”. Neurri eraginkorrak eskatzen eta exijitzen segituko dutela adierazi du asanbladak.
Ondoren, Asun Casasola ipuin lehiaketako bi ipuinen bina pasarte irakurri dituzte, eta agurra dantzatu diote Casasolari. Biolina jotzen omenaldia egin zaio Laffagi. Momentu hunkigarria izan da Txoria txori denek abestu dutenekoa.
Casasolak ere hitza hartu du eta eskerrak eman ditu gaurko ekitaldia antolatzeagatik. Gaurko eguna “oso tristea” dela adierazi du eta gaurko ekitaldiak bere gauzetan ez pentsatzea eragiten dio, eta Irunen beste urteetan omenaldirik egin ez denean “etxean geratu eta gaizki pasa izana” gogoratu du. “Egun hau pixka bat hobeto pasatzen laguntzen didazue”.
Borrokan segitzeko deia egin du: “Borrokan segitu behar dugu, mundu hau hobea izan dadin, beste Nagorerik egon ez dadin. Hemen gauden guztiok ziur gabiltzala mundu hobeago bat lortzeko lanean”.
