Arte Digitaleko lehiaketak 500 euro banatuko ditu
'Ibai izena duen herrialde bat' lehiaketa 30 urtetik beherako pertsonei zuzendua dago eta mugaz gaindiko lurraldearen paisaia bereziak irudikatu behar dira. Parte hartzeko azken eguna hilaren 23a da.
Argazkia: Bidasoa-Txingudi Mugaz Gaindiko Partzuergoa. ‘Ibai izena duen herrialde bat’ Arte Digitaleko lehiaketaren bigarren ekitaldian parte hartzeko epea hilaren 23an (igandea) itxiko da. Irun, Hondarribia eta Hendaiako Udalek antolatutako egitasmoa da, Bidasoa-Txingudi Mugaz Gaindiko Partzuergoaren bitartez.
Aurkezten diren obrek “nahitaezko erreferentzia bat” izan behar dutela jakinarazi dute antolatzaileek: mugaz gaindiko lurraldearen paisaia bereziak irudikatzea. Hori dela eta, parte hartzaileek paisaia natural bat irudikatu ahal izango dute Irun, Hondarribia eta Hendaia hiriek osatutako lurralde mugetan.
Arte Digitaleko lehiaketa 30 urtetik beherako pertsonei zuzenduta dago, eta arte digitaleko teknikak erabiliz, parte hartzaile bakoitzak artelan bakarra aurkeztu ahal izango duela adierazi dute sustatzaileek. Obra irabazleak 500 euroko saria jasoko duela iragarri dute.
Lehiaketa Bidasoko Interpretazio Zentroaren animazio programaren barruan kokatzen da, eta herritarren parte hartzea sustatzea du xede, “ondare historia eta naturala babesteaz eta balioztatzeaz sentsibilizatzeko”.
Informazio osagarria eta lehiaketaren oinarri guztiak Bidasoa-Txingudi Mugaz Gaindiko Partzuergoaren webgunean kontsulta daitezke.
