Poxpologile kalearen berrurbanizazioa, urratsak egiten
Jarduketak maiatzean hasi ziren, eta 14 hilabeteko iraupena izatea aurreikusi dute. Orain, lehen fasean daude, eta bihartik aurrera, aldaketak egongo dira zirkulazioan.
Poxpologile kaleko berrurbanizazioak aurrera darrai. Jarduketa horiek maiatzean hasi ziren, eta aurreranzko urratsak egiten ari dira. Proiektuaren eta jarduera eremuaren hedadura ikusita, lanak bi fasetan gauzatuko direla jakinarazi du Irungo Udalak, “oinezko eta auzotarrei, ibilgailuaren zirkulazioari eta aparkamenduari ahalik eta kalte txikiena egiteko”.
Une honetan, obrak lehen fasean daude, eta Erlaitz eta Dunboa kaleetako bidegurutzeen artean ari dira lanean. Lehen fase hori, bi azpifasetan banatuko dela ezagutarazi du udal erakundeak: lehenik, zenbaki bakoitien aldean egingo dira lanak, ondoren, bakoitien aldean jarduteko. Eremu horietan azpiegiturak instalatzeko eta zolagaina berritzeko lanak egingo dira, eta udalak adierazi du asmoa dela “aparkamenduari ahalik eta kalte txikiena eragitea”. Hori dela eta, “aparkalekuak txandaka” kenduko direla baietsi dute.
Jarduketa horiek eragina izango dute zirkulazioan. Bihartik aurrera (asteazkena, hilak 7), Erlaitz eta Dunboa kaleetako bidegurutzeen arteko zirkulazioa, kanaleranzkoa, irteerakoa bakarrik izango dela aurreratu du udalak, “behin lanak bukatuta utziko dena”. Erlaitz eta Ramon Iribarren kaleetako bidegurutzeen arteko tartea oraingoz bi noranzkoa izango dela esan dute.
Lanen deskribapena
Aurkeztutako proiektuaren helburua da “ingurua bere osotasunean berritzea”. Hori dela eta, jarduketen oinarria kalea berrantolatzea izango dela zehaztu du udalak: ibilgailuek noranzko bakarrean zirkulatu ahalko dute, eta 5 metro zabal den errei bat sortuko da, ibilgailuak kalearen bi aldeetan baterian aparkatu ahal izateko. Antolamendu berriari esker, oinezkoentzako espaloi zabalak sortu eta egungo maila aldeak berdinduko direla iragarri dute. Zuhaitzak ere berrituko dira: eite txikiko zuhaitzak landatuko dituzte, etxebizitzak hurbil egotearekin bateragarriak izan daitezen.
Horrez gain, “oinezkoen zirkulazio segurua” bermatzeko, oinezkoentzako pasabide gehiago sortzea proposatu eta pasabide berriak goratuak izango direla adierazi du udalak, “ibilgailuek abiadura murriztu behar izateko”. Ildo horretan, espaloiak “hobeto” zolatuko direla esan dute, Nafarroako hiribidekoen antzeko baldosak jarrita, eta ezkaratzeko irisgarritasuna hobetuko da.
Proiektua Construcciones Otegui Gaztañaga SL enpesari esleitu zaio, ia bi milioi euroko aurrekontuarekin. Jarduketen aurreikusitako exekuzio epea 14 hilabetekoa da.
