Aena, Hondarribia Arraun Elkartearen babesle berria
Urtebeterako sinatu dute babes akordioa. Uda honetan gizonezkoen zein emakumezkoen ontzietan Aenaren logoa ikusi ahal izango da.
Gaur goizean Donostiako Aireportuko instalazioetan egin dute aurkezpena. Hondarribia Arraun Elkartea eta Donostiako aireportuko pistak zentimetro eskasera daude bata bestearengandik, Jaizubia ibaiak bereizita. Aurtengo denboraldian, baina, bi entitateak inoiz baino gertuago izango dira sinatu berri duten babes akordio bati esker.
Lortutako akordioa erabat “naturala” izan dela azaldu du Joxemi Elduaienek Arraun Elkarteko presidenteak, “aireportuko horman margotutako markekin serieak egiten hazi gara guztiok”. Zuzendaritzan sartu ziren lehen egunetik bilatu duten akordioa dela esan du, eta hortaz, “harro” daudela Aenarekin lan egin ahal izateaz: “Mundu guztiak ezin du esan aireportu bat duenik bere hirian, eta aireportu guztiek ezin dute esan arraun elkarte bat dutenik ia bere instalazioen barruan”.
Jose Manuel Sanchez Donostiako Aireportuko zuzendaria aurkezpenean izan da ere eta Elduaienekin bat egin du akordioaren naturaltasunaz mintzatzerakoan: “Batasun erabat naturala da espazioa eta balioak partekatzen ditugulako. Arraun Elkarteak bezala, lurraldearen aldeko gure apustua epe luzekoa da” azaldu du.
Joxemi Elduaien eta Jose Manuel Sanchezekin batera izan da Angel Sanz Aenako Lehendakaritza, Estrategia eta Gai Publikoen Bulegoko zuzendaria.
Uda honetan arraun elkarteko trainerilla ontzi berde batek egingo die harrera bidaiariei, eta gizonezkoen zein emakumezkoen ontzietan Aenaren logoa ikusi ahal izango da “A Coruñatik Hondarribiaraino”.
Hasiera batean urtebeterako sinatu duten akordioa da, baina biak ala biak beste urte askoan jarraitzeko asmoa erakutsi dute.
