PSE-EE: "Pertsonak babesten dituen hiri eredua da gurea"
Bereziki, garraio publikoaren aldeko politikak nabarmendu ditu Jose Antonio Santano alkategaiak. Izan ere, irundarrentzat "berebiziko garrantzia" duela mugikortasunak eta garraio publikoak baietsi du.
Ekitaldia egin du gaur PSE-EEk Irunen. Argazkia: PSE-EE Txanaleta plaza izan dute gaur topaleku PSE-EEko ordezkariek. Bertan izan dira Jose Antonio Santano alkategaia, Jose Ignacio Asensio Gipuzkoako Ahaldungai Nagusia, eta Rafaela Romero Gipuzkoako Batzar Nagusietarako Bidasoa-Oiartzun barrutiko zerrendaburua. Asensiok herritar guztiak deitu ditu botoa ematera, “asko dugulako jokoan, jendeaz eta bere arazoez ari gara, eta bi kudeaketa eredu daude jokoan: pertsonen eskubideekin pentsatuz kudeatzen duten sozialisten eredua, edo beste alderdiek eskaintzen duten kaosa, paralisia eta atzera bueltatzea”.
Hiri eredu gisa jarri du Irun Asensiok gaur sozialistek hirian egin duten agerraldian, “bertako alkatearen politika egokiei esker, Europarako atea den Irun hiri kudeaketaren benetako eredu bilakatu du, pertsonak ahaztu gabe, eta garrantzitsuagoa dena, balioetan oinarritutako kudeaketa eginda”.
EAJz ere mintzatu da sozialista, “agintaldi honetan erakutsi du ez dagoela herritarren eskubideak aitortzearen alde, lan erreformaren , fortuna handiei begirako zergaren, garraio publikorako laguntzen, edota etxebizitzaren legearen kontra eman duelako botoa”.
Sozialisten eredua defendatu du Santano alkategaiak, “pertsonekin pentsatzen du sozialiston ereduak, horiek zaintzen ditu. Gazteak kanporatzen ez dituen eredua da gurea”. Bereziki, garraio publikoaren aldeko politikak nabarmendu ditu sozialistak. Izan ere, irundarrentzat “berebiziko garrantzia” duela mugikortasunak eta garraio publikoak baietsi du, “eta horrenbestez, gure politiken erdigunean dago. Zerbitzu egokia eskaintzen duen zerbitzu indartsua behar du garraio publikoak, prezio bidezkoa duena herritarrak egunero askatasunez mugitzeko aukera izan dezaten. Finean berdintasunaren eta justizia sozialaren berme delako”.
