Ikasleek Agenda 2030 programan egin duten lana aurkeztu dute
Irungo zazpi ikastetxe atxiki dira egitasmora, eta Garapen Jasangarrirako zazpigarren helburua landu dute: Energia eskuragarria eta ez kutsatzailea.
Irungo zazpi ikastetxek Irungo Udaleko Garapen Jasangarrirako arloak sustatzen duen Eskola Agenda 2030 programan hartu dute. Eguzkitza, Hirubide, Pio Baroja, Toki Alai Siutz, Toki Alai BHI, Txingudi Ikastola eta Txingudi Institutua dira egitasmora atxiki diren ikastetxeak, eta Garapen Jasangarrirako zazpigarren helburua landu dute aurten: Energia eskuragarria eta ez kutsatzailea.
Gaur aurkeztu dute ikasleek hilabete hauetan egin duten lana. Ikasturteko lehen hiruhilekoan motibazioaren fasean egin zuten lan, hezkuntza komunitatea sentsibilizatzen hasita. Bigarren hiruhilekoan, aldiz, ikastetxeko eta udalerriko diagnostikoa egin zuten.
Udalerriko diagnostikoa egiteko, ikasle eta irakasleek hezkuntza ziklo bakoitzeko adinera eta ezagutza mailara egokitutako baliabideak erabili dituztela adierazi dute. Baliabide horien bidez, hain zuzen, landu ahal izan dute zazpigarren helburu hori, bai teorian, baita jarduera praktikoak eginez ere.
Ikasle parte hartzaileek hainbat jarduera egin dituzte ikasgelan eta bertatik kanpo. Azaldu dutenaren arabera, egitasmoaren helburua nagusia izan da “ekarpenak jasotzea udalerriaren egoera hobetzeko”. Horretarako, ikasleek zuzenean behatu, esperimentatu eta hausnartu dute.
Eskolarteko foro bat ere egin zuten hilaren 4an, eta bilkura horren helburua “ekarpen garrantzitsuenak” hautatzea izan zela baietsi dute, “ikasleen lehentasunak” kontuan hartuta. Ikasleen ekarpenek artean, udalerriaren egoera hobetzeko proposamenak eta norberak bere eguneroko bizitzan har ditzakeen konpromisoak biltzen direla nabarmendu dute.
