Lakaxitak adinez heldu dela ospatuko du Jaion! jaialdiarekin
Maiatzaren 20ean ospatuko dute Jaion! urteurren festa. Urtero lez, kamioia Moskutik aterako da 17:00etan, eta kontzertuak 19:00etan hasiko dira gaztetxean.
Aurten ere Jaion! urteurren festa antolatu du Lakaxita Gaztetxeko asanbladak maiatzaren 20rako eta “hipotekatuta nahi gaituzte, okupatu!” da erabiliko duten leloa. 2005ean okupatu zuten etxea eta, beraz, 18 urte beteko ditu Lakaxitak.
Egitarauari erreparatuta, kamioia Moskuko plazatik irtengo da 17:00etan eta kontzertu ibiltaria Zarata taldeak eskainiko du. Bidean aurrera egin ahala, Luis Marianoko lorategietara iristean, geldialdia egingo dute eta bertan drag bingo showa eskainiko dute Alicia Kiss eta Garazy Fantasy Irungo dragek.
Segidan Lakaxita Gaztetxera iritsi eta 19:00etan kontzertuak hasiko dira: Las Tipex, Eskiula 20, Baserriko Oillaxkue Labien eta Las Sexpeares. Sarreraren prezioa 5 eurokoa da.
Horiek bukatzean musika pintxada gaualdia hasiko da. Musika jartzen arituko diren artista guztiak emakumeak dira eta Mosku zein Lakaxita ingurukoak: Erenere, Nya-Nye, S.U.A, Leire Volta eta Bad Sound Sister. Bide horretan, kartelaren egilea Cristina Juaniz micrisantemo izan da, irundarra eta gaztetxeko azken muralaren egilea.
Txanden taula martxan dute eta izen emateko asanbladarekin haien sare sozialen bidez harremanetan jarri behar da. Bestalde, afaltzeko aukera izango da 5 euroren truke eta janaria Larrea janariak taldeak jarriko du.
Bigarren eskuko azoka
Gaztetxeko asanbladak dio jaialdia “ekonomikoki kudeatzeko” bigarren eskuko azoka bat egingo dutela larunbat honetan Peña kalean. Horretarako jendeari eskatu diote jada balio ez dien arropa eta txukun dagoena eramateko eta bildutako diruarekin ere Jaion! antolatuko dutela azaldu dute.
Azoka 11:00etan hasiko da eta 15:00etan bukatu eta giroa animatzeko S.O.K.I arituko da musika jartzen. Era berean, Jaion! jaialdiko sarrerak erosteko aukera izango da azokan, 5 euroren truke.
