Larunbatean egingo da XII. Hondarribiko Triatloia. Guztira bi proba burutuko dira: 15:00etan lehena, 17:15ean bigarrena. Probak trafiko aldaketak eragingo ditu.
Larunbatean bi triatloi proba egingo dira Hondarribian XII. Hondarribiko Trialoi probaren baitan.
Lehen probaren parte hartzaileak 15:00etan abiatuko dira Hondarribiko hondartzatik: 375 metro igeri, 10 km bizikletaz eta 2,5 km lasterka burutu beharko dituzte. Bigarren proba, berriz, 17:15ean abiatuko da leku beretik. Kasu honetan 750 metro igeri, 20 km bizikletaz eta 5 km lasterka egin beharko dituzte. Ibilbidea ezberdina izango da bi kasuetan, helmuga, aldiz, Hondartza kiroldegiko atletismo pistan izango da guztientzat.
Trafiko aldaketak
Probak direla-eta zenbait trafiko aldaketa izango dira herrian. 15:10etik 16:00ak arte Hondartza ingurua (Higer Itsasargiraino) itxita egongo da. Eta, 17:15etik 18:30ak arte, Hondartzako biribilgunetik Labrederreko biribilguneraino moztuko da errepidea. Ordu berean, Jaizkibelera doan errepidea ere itxi egingo dute, noranzko bikoitzan.
