Oztopoak oztopo, hemen da Irungo XXVI. Sagardo Eguna
Sagardoaren festa datorren larunbatean izango da, hilak 13, 18:00etatik 21:00etara, Urdanibia plazan. Bildutako dirua Taupadak GKEri igorriko zaio.
Eguna prestatzeko “arazo eta zalantza” handiak izan badituzte ere, gaur goizean aurkeztu dute Irungo Ola Sagardotegian aurtengo Sagardo Eguna Taupadak GKEko Fernando de la Hera presidenteak, Miguel Angel Paez Irungo Udaleko ordezkariak, Ola Sagardotegiko Iñaki Bengoetxeak eta hiriko elkarte gastronomikoen ordezkariek.
Sagardoaren festak hogeita seigarrenez hartuko du Urdanibia plaza datorren larunbatean, hilak 13, 18:00etatik 21:00etara. Jaiak kutsu solidarioa izango du, bildutako dirua Taupadak GKEri igorriko baitzaio. Erakunde horrek Boliviako Amazoniako herri indigenak babesten egiten du lan. Kale animazioari dagokionez, Irungo kontserbatorioko trikitilariak arduratuko dira plaza girotzeaz.
Sagardo Eguna errealitatea izango bada ere, eguna egikaritzeko bidea trabaz betetakoa izan da antolatzaileentzat. De la Herak aitortu du “pena” iruditzen zitzaiela eguna ez egitea, baina zalantza horien zergatiak azaldu ditu: “Faktore nagusia prezioen gehiegizko igoera izan da, gastu guztiak igo dizkigute. Zenbakiak egiten hasi ginenean ikusi genuen galtzen atera gintezkeela”.
Hori dela eta, Gipuzkoako Sagardotegi Elkartearen eskutik joango dira irundarrak, eta aldaketa batzuk sartu dituzte egunean. Ohikoa den edalontzia kopa batengatik aldatuko dutela aurreratu dute antolatzaileek, eta kopa hori elkarteak ekarriko du. Aurtengo Sagardo Egunaren txartelaren prezioa hamar eurokoa izango da, eta hamar sagardo tragoz eta pintxo batez gozatu ahal izango dute Urdanibiara bertaratzen direnek. 17:30etik aurrera eskuratu ahalko dira tiketak.
Berritasun moduan ez da bakailao pintxorik egongo; patata tortilla, txorizoa eta txistorra dastatu ahal izango dira. Zapiak ere ez dira salduko, eta herritarrei beste urte eta jai batzuetakoak berrerabiltzeko deia luzatu diete. Horrez gain, banatuko diren kopak itzultzeko aukera egongo da, eta itzultzen dutenei bi euro bueltatuko zaizkie.
Hauexek dira dastatu ahal izango diren sagardoak:
- Aburuza (Aduna).
- Altuna (Urnieta).
- Astarbe (Astigarraga).
- Etxeberria (Astigarraga).
- Gartziategi (Astigarraga).
- Iparragirre (Hernani).
- Izeta (Aia).
- Lizeaga (Astigarraga).
- Mizpiradi (Andoain).
- Ola (Irun).
- Ordozelai (Oiartzun).
- Petritegi (Astigarraga).
- Rezola (Astigarraga).
- Oianume (Urnieta).
- Urdaira (Usurbil).
- Zelaia (Hernani).
