'Gure haizea' gurutzontzien estropadaren I. edizioa antolatu dute
Estropalariek 30 milia nabigatuko dituzte hilaren 14an. Hiru sailkapen egongo dira: bakarkakoa, bikanakoa eta L klasekoa.
Gaur goizean 'Gure haizea' gurutzontzien estropadaren aurkezpenean. Gaur goizean, Hondarribiko Kirol Kaian egin dute ‘Gure haizea’ gurutzontzien estropadaren lehen edizioaren aurkezpena. Hondarribia (C.N.H.), Hendaia (Y.C.H.), Donostia (R.C.N.S.S.), Zumaia (C.N.Z.), Anglet (Y.C.A.A.) eta Hendaiako (CMHT) klubek elkarlanean sortu dute nabigazio erronka berri hau.
Auzkezpenean “oso ilusionatuta” agertu dira antolatzaileak: “Bertan, gure kostaldeko nabigatzaileak elkartuko dira eta haien guztien arbasoek balea ehizatzen zuten uretan ibiliko dira”. Gainera, Akitaniako zein Gipuzkoako klubak senidetzeko “aitzakia ona” izango dela azaldu dute.
Datorren igandean (hilak 14) Hondarribiko kirol kaitik abiatuko dira estropalariak eta Baionaruntz egingo dute bidea. Baionan ezarriko duten barko-buia inguratu eta Hondarribira itzuliko dira, ahalik eta lasterren. 30 milia nabigatu beharko dituzte guztira. Hiru sailkapen egongo dira: bakarkakoa, bikanakoa eta L klasekoa.
Antolatzaileek azaldu dutenez Fernando Mikelarena eskultoreak osatutako trofeoa, bi emaitza onenak batuta puntu gutxien lortzen dituen klubak eramango du etxera.
Estropadak Ederlog Multimodal enpresaren diru laguntza jasoko du, eta Euskadiko Kirol Portuak, Hondarribiko Udala, Gipuzkoa Kirolak eta Gipuzkoako Bela Federazioaren laguntza du.
