Urpeko zinema izango da hil bukaerako protagonista
CIMASUB Nazioarteko Itsaspeko Zinema Zikloa egingo dute hil bukaeran. Hilaren 23tik 25era bitarte, egunero film bat proiektatuko dute Itsas Etxean.
Silanes eta Sanchez, gaurko aurkezpenean. CIMASUB Nazioarteko Itsaspeko Zinema Zikloak Itsas Etxea Auditoriuma hartuko du datorren hilaren 23, 24 eta 25ean. Egunero (19:00etan) film bat proiektatuko dute, doan.
Gaur aurkeztu dute egitaraua Juan Luis Silanes zinegotziak eta David Sanchez Errealeko Urpekaritza Taldeko zuzendariak.”Gure itsasoak zer nolako egoeretan dauden ikusteko parada bikaina da. Aspaldidanik datorren arazo bat da eta gaur egun oso handia bilakatu dena. Ziklo honen helburua, arazo hori nolakoa de ikustaraztea da, bideo labur eta ikusgarriekin”, esan du Silanesek. Sanchezek gaineratu duenez, “planetaren bizi iraupenerako hain garrantzitsuak diren itsaso eta ozeanoen edertasuna eta narriadura” erakutsiko dute proiekzio guztiek.
Zikloari lotuta, aurten ere Txikizikloa egingo dutela aurreratu du udalak, hilaren 22an hain zuzen. Itsas Etxean izango da, 10:00etan. Bertan, LHko 5. eta 6. mailako 10 eta 12 urte bitarteko haurrek parte hartuko dute. Honetan, ingurumenaren egoeraz ariko dira, “kontsumo osasuntsu eta arduratsuaren eta ingurune hurbilaren errespetuaren eta zaintzaren jarrerak garatuko” dituztela aurreratu dute.
Argazki erakusketa bat ere antolatu dute egitasmoari jarraipena emanez. Hala, hilaren 26ra bitarte aurtengo ediziora aurkeztutako argazki onenen erakusketa ikusgai izango da Arma Plazan, 10:0e0tatik 18:00etara. Aurkeztutako ia 300 argazkietatik 24 aukeratu dituzte, mundu osotik jasotakoak.
