Zazpi proposamenetatik, bost onartuta
Luzea izan zen atzoko Osoko Bilkura, ia hiru ordu eta erdikoa. Talde guztiek aurkeztutako zazpi proposamenetatik bost onartu zituzten.
Luzea izan zen atzoko Osoko Bilkura, ia hiru ordu eta erdikoa. Hamaika puntu landu zituzten udaletxeko pleno areto nagusian, horien artean zazpi proposamen eztabaidatu zituzten, bost onartuta.
Onartutako lehen proposamena Abotsanitz taldeak aurkeztutakoa izan zen. Hondarribiko Udalak Mugiment Kirol Txartela egitasmoarekin bat egiteko eskaera egin zuen taldeak. Denen aldeko bozkekin, aurrera atera zen.
EH Bilduk proposatu eta jeltzaleekin adostutakoa izan zen onartutako bigarrena. Honetan, “gogor” salatu zuten “epaitegiek abiatu duten hizkuntza politikaren judizializazioa eta euskararen kontra ematen ari diren epaiak”. Hala, honako konpromisoak hartu zituen udalak: Udal zerbitzuetan herritarrei lehen hitza euskaraz egitea bermatuko duela, zerbitzu publiko guztiak euskaraz eskaintzea bermatuko duela eta lan, zerbitzu eta komunikazio hizkuntza euskara ere izango dela. EAJ, Abotsanitz eta EH Bilduren aldeko botoak jaso zituen proposamenak. PSE-EE abstenitu egin zen.
Errolda sozialari buruz Abotsanitzek aurkeztutako proposamena ere onartu zuten atzoko saioan. Hala, errolda soziala martxan jartzeko helbide ofizial bat jarriko du udalak, eta bertan sartzeko protokolo bat sortzea adostu zuten zinegotzi guztiek, aho batez.
EAJk aurkeztutakoa ere denen aldeko babesarekin onartu zuten. “Espainiako Gobernuari eskatzea berma dezala, Foru eta Ramon Iribarren kaleen inguruko mugaketa lerroa aldatuta gaur egun hiriaren eta ingurumenaren arteko harmonia erabatekoan egiten diren jardueren erabilerak errespetatzea” jaso dute honetan.
Azkenik, PSE-EEk energia komunitateen inguruan aurkeztutakoa ere onartu zuten, aho batez. Udal eraikinetako estalkiak eskuragarri jartzea proposatu zuten, “gainerako herritarrek energia komunitateen bidez elektrizitatea sortzeko eta kontsumitzeko eredu eraginkorra lor dezaten, eta udala bere horrelako egitasmoen bultzatzaile izan dadin”. PSE-EE, EAJ eta Abotsanitz alde agertu ziren, eta EH Bildu abstenitu egin zen.
