Arrantzaren etorkizuna ziurtatzeko "berme bakarra" direla dio PSE-EEk
Datorren astean Espainiako Senatuan onartuko duten arrantza eraginkorrerako lege berriaren harira, Hondarribiko portua bisitatu dute PSE-EEko zenbait kidek. Arrantzaren sektorea "sozialisten apustu estrategikoa" dela esan dute.
Datorren astean arrantza eraginkorrerako lege berria onartuko dute Espainiako Senatuan. Onarpenaren atarian, Hondarribiko portua bisitatu du PSE-EEko Gipuzkoako Aldundirako ahaldun nagusigai Jose Ignacio Asensiok. Berarekin batera izan dira Espainiako Kongresuko ordezkari Ariagona Gonzalez eta Hondarribiko alkategai Noemi Odriozola.
Arrantzaren sektorea “sozialisten apustu estrategikoa” dela esan du Asensiok, eta etorkizuneko arrantza eraginkorraren legeak sektoreari “onurak” ekarriko dizkiola. Lege berri honek arrantzaleen erretirorako “babes handiagoa” eskainiko duela ere esan du. Lege, honek, gainera, saregileak, itsasontzia deskargatzen duten (neskatillak) eta fardo makinetan aritzen diren emakumeak ere babestuko dituela ziurtatu du Asensiok, “koefiziente erreduktore bat” jasoko dutela jubilatzeko gutxieneko adinean.
“Gogorarazi nahi dut lege hau oso garrantzitsua dela Gipuzkoarentzat. Gipuzkoan 90 itsasontzi ditugu, 850 arrantzale eta baita ere 60 emakume sarigile. Lege hau bide bakarra da sektorearen etorkizuna bermatzeko, eta garapen aukera bat da Hondarribiko eta Gipuzkoako arrantzaleentzako”, erantsi du. Arrantzaren etorkizuna ziurtatzeko PSE-EE “berme bakarra” dela erantsi du eta lege berri hori izango dela sektorea “biziberritzeko eta mantentzeko erreminta eraginkorra”.
