Krea Bidasoaren hamalaugarren edizioa, hilaren 30ean
Edizio honetan 400dik gora lagun bilduko dira Ficoban. Ekintzaileak, enpresak, erakunde publiko zein pribatuak eta beste hainbat eragile izango dira bertan.
Krea Bidasoa Aurten ere, Irun eta Hondarribiko Udalek, Bidasoa Bizirik-en bitartez, Krea Bidasoa ekitaldia antolatu dute. Hilaren 30ean (osteguna da) egingo dute, Ficoba erakustazokan. Hamalaugarren edizio honetan 400dik gora lagun bilduko dira. Ekintzaileak, enpresak, erakunde publikoak zein pribatuak eta beste hainbat eragile izango dira bertan. Guzti hauek harremanak egin ditzaten izango du helburu ekitaldiak, “ezagutzak zabaldu eta negozio joera eta aukera berriak identifikatu ahal izateko”.
Ekintzailetza, sormena eta berrikuntza izango dira aurtengo programazioaren ardatz nagusiak. “Helburua enpresa sarearen eraldaketa gaitasuna transmititzea eta Irunen eta Hondarribian berrikuntzari lotuta sortzen ari diren negozio eredu berriak ezagutaraztea da”, esan du Maria Serranok, agentziako presidenteordeak.
Aurtengo edizioan, gainera, nortasun bisual berria aurkeztuko dutela aurreratu dute. Ekitaldian bertan egingo dute aurkezpena.
Programa “biribila”
Bidasoa Bizirik-ekn arabera, “programa biribila” antolatu du hamalaugarren edizio honetarako. Tailerrak eta hitzaldiak antolatu dituzte. BIC Gipuzkoak ere parte hartuko du, eta Datorren eraldaketa izeneko hitzaldiaren bitartez, negozio ideia bat sortzeko, hazteko, sendotzeko eta proiektatzeko faseari heltzeko jarraibideak emango dituzte.
Ekitaldi guztiak kontsultatzeko, jo esteka honetara.
