Irun Market, "online salmentarik ez zutenentzako leiho bat"
Tokiko merkataritza sustatzeko online plataformak bi hilabete bete ditu, eta horren gaineko balorazio baikorra egin dute kideek.
Paez alkateordea, Deperita fruta-dendako Victor Ortega eta Badoa kooperatibako Fer eta Joanes kideak. 
Irun Market tokiko merkataritza sustatzeko online plataformak bi hilabete bete berri ditu, eta horren gaineko balorazioa egin dute udal ordezkariek. Miguel Angel Paez alkateordeak, gainera, zenbait berritasun iragarri ditu gaur, plataformari atxikitako Vinos Arambarri dendan.
Udalak plataformaren aldeko apustua egiten jarraituko duela berretsi du Paezek. Azaroaren 24an jarri zen martxan Irun Market, eta hasiera batean, hogeitik gora saltokik osatzen zuten, baina aste honetatik aurrera parte hartu nahi duten establezimendu berriak ere atxiki ahalko dira, noiznahi, inongo epemugarik gabe. Online egin daiteke hori.
Udal ordezkariak bide onean ari direla uste du: “Lehenengo fasea, sistema ezartzeko eta hartara egokitzeko fasea, positiboa izan da, eta orain, hazteko eta saltoki berriak animatzeko txanda da”. Bi hilabete hauetan salmentek gora egin dutela ziurtatu du. Josu Sanchez edaritegiko jabeak berretsi du “bultzagarri bat” dela, “online salmenta zerbitzurik ez zuten saltokientzako leiho bat”.
Prentsaurrekoan, plataformari atxikitako establezimenduak identifikatzeko eranskailu bat aurkeztu du zinegotziak, salgaiak bidaltzeko pakete guztietan ere jarriko dena. Era berean, ordezkariak jakinarazi du otsaileko lehen hamabostaldian birziklatze saio bat egingo dela lehendik izena eman duten negozioentzat, online, “kontzeptuak errepasatzeko”.
