Bakearen eskola eguna ospatuko da astelehenean
Irungo Udalak Lehen Hezkuntzako ikasleei eskatu die bakea irudikatzen duten mezuak eta marrazkiak bidal ditzaten. Horiekin, erakusketa bat antolatuko da datorren astean Palmera Monteron.
Astelehenean, hilak 30, indarkeria ezaren eta bakearen eskola eguna ospatuko da, data horretan hil baitzen Mahatma Gandhi lider bakezalea. Indarkeria eza eta erresistentzia baketsua babestu eta sustatu zituela adierazi dute, eta ideia horiek defendatzeagatik erail zutela gaineratu dute.
Hori dela eta, Irungo Udalak egun horrekin bat egin du, eta deialdi bat zabaldu die hiriko Lehen Hezkuntzako ikastetxeetako ikasleei mezuak eta marrazkiak bidal ditzaten, haientzat bakeak zer esan nahi duen irudikatuta.
Jasotako mezu eta marrazki guztiekin erakusketa bat antolatuko dute Palmera Monteron, eta ikusgai egongo da hilaren 30etik otsailaren 1era, 08:00etatik 20:00etara, hau da, datorren astelehenetik asteazkenera.
Proposamenak bi modutara bidal daitezke: aurrez aurre edo korreoz. Aurrez aurreko hautua egiten dutenek Palmera Monteroko harreraren ondoan jarriko den erakustokian utz dezakete beren lana hilaren 23tik 28ra, bi egunak barne. Bestalde, Palmera Monterora joaterik ez dutenek, emailez bidal ditzakete marrazkiak PDF edo JPG formatuan, hilaren 29ra arte.
Rebeca Gonzalez Balioetako eta Giza Eskubideetako ordezkariak ikastetxeei eskerrak eman dizkie egitasmoan parte hartzeagatik, eta nabarmendu du hezkuntzak zeregin “oso garrantzitsua” duela tolerantzia, elkartasuna eta bakea bezalako balioak transmititzeko. Horregatik, iniziatiban parte hartzeko deia luzatu du.
Gonzalezek gogorarazi du iaz antzeko egitasmo bat abiatu zutela. ‘Bakearen usoa’ izeneko eskultura jarri zuten Luis Mariano plazan, eta haren barruan bildu zituzten marrazki guztiak.
