Txingudi errugbi klubeko emakumezkoen taldea, lehiarako prest
Emakumezkoen senior taldea berreskuratzeko lanean hasi zen kluba iaz. Orotara, Irun eta Hondarribiko hamahiru jokalari zelairatuko dira.
Txingudi errugbi taldeak emakumezkoen taldea zelairatuko du gaur (hilak 21) Iruñean, Nafarroako emakumezkoen 14 eta 16 urte azpikoen topaketan parte hartuko baitute. 12:30ean ekingo diote lehiari, Nafarroako Unibertsitate Publikoko zelaian.
Iaz hasi zen kluba emakumezkoen senior taldea berreskuratzeko lanean, proiektuak bere fruituak eman ditu. Maider Aizpurua eta Asun Gamíndez ariko dira entrenatzaile gisa, orotara, hamahiru jokalari zelairatuko dira.
“Urtebete ez da igaro eta honelako ekintza batean parte hartzeko ahalmena dugu. Oso pozgarria da hasitako bideak eman dituen emaitzak hain azkar ikustea”, diote klubeko iturriek. Bi zati izango ditu gaurkoak, eta ohiko hirugarren denborarekin bukatuko dute. “Nafarrekin batera ezagutzak partekatzeko aukera izango dugu eta, ondoren, gure entrenamenduetan landutakoa lagunarteko partida batean probatuko dugu”, azaldu du Gamíndez entrenatzaileak.
