Asobal Ligan hiru porrot jarraian izan ondoren, premiazkoa du irabaztea talde irundarrak. Bihar izango dute horretarako aukera, Huesca jasoko baitu Artalekun, 18:30ean.
Argazkia: Bidasoa Irun. EHF European Leagueko partidak pasata, gaur hasiko da Asobal Ligako hamalaugarren jardunaldia. Bidasoa Irunek Artalekun jokatuko du bihar Bada Huescaren aurka, 18:30ean. Neurketa oso garrantzitsua izango dute Jacobo Cuetararen mutilek, ligako azken hiru norgehiagokak galdu ondoren premiazkoa baitute irabaztea eta puntuak poltsikoratzea. Bolada txarra ahalik eta azkarren irauli behar dute.
Jacobo Cuetara prestatzailea kontziente da porrot asko izan dituztela eta “porrot bakoitza gero eta astunagoa” dela, baina argi du “bertatik atera” behar dutela eta, horretarako, “taldeari konfiantza eman eta adorea transmititu” behar zaiola. “Garaipen batekin dena alda daiteke eta aukera hau aprobetxatu behar dugu”, gaineratu du.
Biharko aurkaria Bada Huesca da. Aragoitarrak sailkapeneko hamargarren postuan dira hamar punturekin. Bidasoa, ordea, zazpigarren da, hamalaurekin. Cuetarak aitortu du aurkaria “dinamika onean” dagoela, eta edozein partida bezala “zaila” izango dela: “Behetik gora doan taldea da Huesca, ondo lehiatzen ari dena. Cuencan berdintzeko gai izan da, daukan zailtasunarekin. Oso talde lehiakorra da, ideiak oso argi ditu eta ondo entrenatua dago”.
Bidasoak, baina, puntuak pilatzen hasi behar du, eta Artalekuren babesa gakoa izan daitekeela ziur da prestatzailea: “Gogoz gaude gure zaleen babesarekin egoteko, irabazteko eta gauden zulotik ateratzeko. Partida on bat egiteko gogoarekin gaude”.
Hilaren 13an Bidasoa Irunek Eurofarm Pellister talde mazedoniarraren kontra jokatuko du EHF European Leagueko seigarren jardunaldian. Ondoren, baina, hilabete eta erdiko atsedena izango dute lehiaketek Munduko Txapelketagatik. Hori dela eta, geldialdi horretara ahalik eta ondoen iristea nahi du Cuetarak: “Urtarrileko geldialdia hor dago, eta azken ahalegina egin behar dugu ahalik eta puntu gehien lortzeko”.
Biharko partidako sarrerak salgai daude klubeko webgunean.
