Pio Barojaren figura oroituko dute hilaren 23an
Aurten 150 urte bete dira idazlearen jaiotzatik eta Irungo Udalak hainbat jarduera antolatu ditu urtean zehar. Hurrengoa hilaren 23an izango da, Zabaltza plazan.
Pio barojaren eskultura Zabaltza plazan. Argazkia: Irun.org. Aurten 150 urte bete dira Pio Baroja idazlearen jaiotzatik, eta Irunen hainbat iniziatiba, egitasmo eta jarduera antolatu dituzte urtean zehar hura oroitzeko. Hurrengo ekitaldia hilaren 23an izango da (asteazkena da), Zabaltza plazako eskulturaren ondoan, 18:00etan, eta Barojaren figura omenduko dute. Jose Antonio Santano alkatea eta Pio Caro Baroja idazlearen iloba txikia izango dira omenaldi horretan.
Hiriko gazteek ere parte hartze esanguratsua izango dute ekitaldian, musika eskolako eta Pio Baroja institutuko ikasleek idazlearen legatuaren berri emango baitiote bertaratzen direnei. Horrez gain, Myriam Perez artista irundarrak egun horretarako berariaz sortutako dantza emanaldi bat interpretatuko du.
Urteurren berezi horren oihartzuna lau haizetara zabaltzeko xedearekin, Irungo Udalak sare sozialetan Barojari buruzko hausnarketak, testuak edo idatziak partekatzeko deia luzatu du. Horretarako, edukiak #PioBaroja150 traol-hitzarekin partekatzea eskatu du udalak, @irun_informa erabiltzailea aipatuta, Twitterren eta Instagramen.
Barojaren figuraren omenaldia udalak antolatu dituen jardueretako bat baino ez da. Kultura arloak sustatuta, momentu honetan lankidetza proiektu batean murgilduta dago udala Pio Baroja institutuko arte batxilergoko bigarren mailako ikasleekin. Larraitz Ugartemendia irakasle eta artistaren laguntza eta bitartekaritzarekin, ikastetxeko eraikinaren fatxadetako batean instalatuko den olana handi bat diseinatu dute, urte bukaeran inauguratzea espero dena. Ikasleek sortutako ikus-entzunezko beste proposamen batzuk ere izango dira.
Urtean zehar CBAra joaten direnek ere Barojari Madrilgo Retiro parkean egin zioten argazki bat ikusiko dute, binilo handi batean erreproduzitua. Irudi horretan dago inspiratua, hain zuzen, Zabaltza plazan 2006ko urriaren 30ean jarri zen eskultura.
