Urrian, hainbat jarduera Oiasso Museoan
Oiasso Museoak Ondarearen Europako Jardunaldien harira antolatu diren jarduerekin bat egin du. Bisitak eta txango arkeologikoak prestatu dituzte.
Irungo Udaleko Kultura sailak jakinarazi du Oiasso Erromatar Museoak bat egin duela Ondarearen Europako Jardunaldien harira antolatu diren jardueren eskaintzarekin. Egitasmo horren helburua da ondareaz modu jasangarrian gozatzera animatzea, ondarea zaindu eta belaunaldi berriak hartaz gozatzen jarrai dezaten bermatzeko.
Alde batetik, Oiasso Museoak Irugurutzetako meatze barrutia eta Aiako Harriak natur ingurunea ezagutzera animatu nahi ditu herritarrak bisita bidez. Irugurutzetako ondare eremuan meatze galeriak eta minerala kiskaltzeko labeak daude. Aiako Harriko eta haren inguruko meatze ustiapenak erromatarren garaian hasi ziren, eta Irugurutzetan bisita daitezkeen egiturak, berriz, garai industrialekoak dira.
Bisita horiek larunbatero izango dira, 11:00etan, meategiak dauden paraje naturalean bertan. Oiassok bisitariei Irugurutzera bizikletaz bertara daitezen proposatu die. Bisiten prezioa 5,50 eurokoa izango da helduentzat, eta 3,85 eurokoa 6-14 urte bitartekoentzat. Erreserbak 24 ordu lehenago egin behar dira, 943 63 93 53 telefonora dei eginez.
Bestalde, Oiassok txango arkeologikoa antolatu du Arabara hilaren 22an, larunbata. Irteera horretan Iruña-Veleiako eta Arkaiako aztarnategi arkeologikoak eta BIBAT Arabako Museo Arkeologikoa ezagutuko dira. BIBATen, gainera, ‘Tutankamon, 100 urtez liluratuta’ erakusketa bisitatuko da. Erakusketa hori Egiptoko faraoiaren hilobia aurkitu zuteneko mendeurrena ospatzeko antolatu dute.
Arabako irteeraren prezioa 60 eurokoa da pertsonako, eta prezio horren barruan sartu dituzte autobuseko joan-etorria, aztarnategien eta museoaren bisitak, bazkaria eta bidaia asegurua.
Tokia erreserbatzeko, museora deitu beharko dute interesdunek (943 63 93 53). Erreserba eginda, esku dirutan, txartelarekin edo banku transferentzia bidez ordaindu beharko da. 30 pertsonarentzako taldea osatzea dago aurreikusita, eta bidaia bertan behera utzi ahal izango da zifra horretara iristen ez bada. Informazio gehiago Oiasso Museoaren webgunean edo 943 63 93 53 telefonoan aurkituko dute interesdunek.
