Urria eta azaroan ere, Haurrak Parkean programa
Euria ez da aitzakia izango eta estalpeak proposatu dituzte aisia euskaraz egin ahal izateko urria eta azaroan ere.
Familia Ola eta Haurrak parkean programen baitan datozen asteetan egingo dituzten jardueren berri eman du Euskara saileko ordezkaria Miren Etxebeste, Josebe Araña, udaleko hizkuntza normalkuntzako teknikaria eta Itsaso Bakedano, Hezten enpresaren ordezkariak.
Familia OLA
Familietan euskararen transmisioa bermatzeko asmoarekin sortu zuten Familia Ola programa 2009an, eta bereziki 2 eta 8 urte bitarteko alaba eta semeak dituztenei zuzendutakoa da.
Euskararen erabilera espazio formaletatik kanpora da sustatu nahi dutena eta horretarako sukaldaritza tailerrak, eskulanak eta txangoak antolatzen dituzte. Parte hartzeko Irunen erroldatuta edota Irungo ikastetxe batean matrikulatuta egon behar da. Horrez gain, urriaren 30a baino lehen eman behar da izena. Honako hauek dira datozen asteetan egingo direnak:
- Gorputz adierazpen tailerra. Azaroaren 15 eta 17an, 17:30etik 19:00etara. Gorputz-adierazpena ardatz hartuta, arratsaldea joko kolektiboekin eta musikarekin pasatuko dute familian.
- Donostiako Aquariumera irteera. Azaroaren 20ean, 11:00etan.
- Ekintzak ilustratzeko tailerra. Azaroaren 22 eta 25an, 17:30etik 19:00etara. Jone Taberna artista izango da tailerraren gidaria eta artelanak sortzeko aukera egongo da.
Haurrak parkean
Euskaraz jolasteko baliabideak eskaintzea du xede egitasmo honek. Horretarako, familiak eta zaintzaileek parkeetan euskaraz jolasteko ohitura hartzea bultzatu nahi dute.
Izena ematen duten haurren adinaren arabera osatzen dituzte taldeak, baina normalean bi talde sortzen direla azaldu dute; 3 eta 5 urte bitarteko haurrena eta 6 eta 9 urte bitartekoena. Lehenengo taldean jolastu egiten dute bakoitzaren zaintzaileekin eta bigarrengoan bi hezitzaile egoten dira jolasak egin ahal izateko. Jolas egunak hauek dira:
- Urriak 19, 26 eta azaroak 2 eta 9, asteazkenak. Nagore Laffage parkean, Palmera Monteron. Euria egingo balu aterpean egingo da jarduera. Egun berean baita ere Partxis parkean, Elitxun.
- Urriak 21, 28 eta azaroak 4 eta 11, ostiralak. Kateako pilotalekuan eta San Juan plazan. Azken kokaleku honi dagokionez, euria egiten badu udaletxeko arkupeetan elkartuko dira.