'HaurARTEan' tailerrak, errespetuzko hazkuntzan ardaztuta
Hiru tailer antolatu dira guraso eta hezitzaileentzako Palmera Monteron udazkenean zehar. Helburua da familietan harreman osasungarriak sortzea eta garapen positiboa bultzatzea.
Irungo Udaleko Gazteria Zerbitzuak ‘HaurARTEan’ programaren esparruko errespetuzko hazkuntzan oinarritutako hiru tailer antolatu ditu udazkenean guraso eta hezitzaileentzako. ‘HaurARTEan’ programaren helburua da tokiko ikaskuntza komunitate bat izatea, haurren eta nerabeen eskubideak ardatzean jartzen dituena. Gauzak horrela, urritik abendura egingo diren hiru tailerrak guraso eta hezitzaileentzako dira, eta horien asmoa da familietan harreman osasungarriak sortzea eta garapen positiboa bultzatzea.
Santi Jimenez ordezkariak eman zuen tailerren berri, eta horien inguruko xehetasunak eman zituen: “Baliabide horien bidez, lortuko duguna da gurasoak gai izatea batzuetan ulertzen ez dituzten egoerei aurre egiteko. Betiere positibotasunean oinarritutako estrategia adeitsu batetik, gure seme-alabek harremanak izateko modu berriak ikas ditzaten, beraien autoestimua areagotzeko eta autonomoago izateko, beren kabuz balia daitezela. Udaletik horrelako ekimenak sustatzen jarraituko dugu, gure haurrak baitira hiriaren etorkizuna”.
Saioak profesionalek emango dituzte, eta heziketa digitalarekin lotutako hainbat gai landuko dituzte. Tailer guztiak doakoak dira, eta Palmera Montero gunean izango dira, 17:30etik 19:30era. Izen-emateak irekita daude dagoeneko, eta Irungo Udaleko webgunetik egin behar dira. Horrez gain, udaletik zehaztu dute, kontziliazio zerbitzua eskainiko zaiela 3 eta 8 urte bitarteko haurrak zaintzen dituztenei.
Hilaren 21ean egingo da lehen saioa. Marisa Moya hezitzaileak eta diziplina positiboan erreferente denak, lerro horren estrategiei eta printzipioei buruz hitz egingo du. Bigarren tailerra azaroaren 3an izango da, eta Nerea Mendizabal psikopedagogoak eta komunikazio ez bortitzean adituak hartuko du parte. Saio horren ardatza izango da zer garrantzitsua den gure buruarekin eta besteekin guk nahi dugun komunikazioa lortzea. Azkenik, hirugarren saioa abenduaren 1ean egingo da. Sharlotte Limodin parentalitate sortzaileko hezitzaile eta aholkularia izango da bertan, eta haurren autoestimua autoerregulazioan lagunduz bultzatzeak duen garrantzia izango du hizpide.
Honakoa da programazio osoa:
Urriak 21: Ulertu eta egin; irmotasunez eta lainotasunez hezteko erronka.
- Hizlaria: Marisa Moya, hezitzailea eta diziplina positiboan aditua.
- Ordutegia: 17:30etik 19:30era.
- Hizkuntza: Gaztelaniaz.
- Lekua: Palmera Montero.
Azaroak 3: Komunikazio ez bortitza.
- Hizlaria: Nerea Mendizabal, hezitzailea eta komunikazio ez bortitzean aditua.
- Ordutegia: 17:30etik 19:30era.
- Hizkuntza: Euskaraz, gaztelaniara itzulia.
- Lekua: Palmera Montero.
Abenduak 1: Autoestimua indartzea autoerregulazioan lagunduz.
- Hizlaria: Sharlotte Limodin, hezitzailea eta parentalitate sortzaileko aholkularia.
- Ordutegia: 17:30etik 19:30era.
- Hizkuntza: Gaztelaniaz.
- Lekua: Palmera Montero.
